28/04/2016
唔開心,有辦法!
一個人性格上的陰霾,在相學上是有一套邏輯的。
面相的眉垂眼垂、動相的頭耷耷、掌相的智慧線極之彎垂(智慧線是橫過掌中、由上而下數第二條線,若十分彎垂,向手腕左邊進發,在極端的例子,有自殺傾向)等,都是這邏輯的一部分。
以上特點,有位女友全部bingo晒,幸好佢膽小,應該冇勇氣自殺,但經過第N次失戀後,身心皆全面罷工──唔食得、唔瞓得、加埋唔做得,即連工都唔想返,只想喊!我真係驚佢唔止失咗想像中嘅老公,可能失埋現實中呢份工!
「你係咪想全職喺屋企喊呢?」我問佢。
「我好冇心機,做人都唔好玩嘅!」
「睇你個相,未走得噃。」
「你陪我去求吓簽,睇吓有冇得救吖。」
「唔使去求咧,你聽住吓!頭耷眼又耷、成日眼濕濕、做事雖然急,總冇齊輯輯,人又細細粒,以為畀人恰,有金唔識執,見到都心噏。」
「嘩!咁準嘅!係邊度嘅簽文呀?」
「係我作嘅。」
「你去死啦!」她竟然笑了。
仲識笑,有得救!
笑的magic真係唔嘢少。
上世紀初最偉大的笑匠差利卓別靈不只留下城市之光,還留下快樂的秘笈。
一次他向一班踴躍的觀眾說了一個笑話,全場笑翻,報以熱烈掌聲,他跟住重複這笑話,笑聲已寥落,到他番炒第三次時,簡直冇人笑。
不要以為他江郎才盡,或已步入痴呆,原來有美麗的意圖、睿智的訊息在後。
「如果你不會因同一個笑話而笑兩次,為甚麼會因同一憂慮而愁兩次呢?」他說.
我這女朋友,還因情場失意而愁第一百次!她實在應汲取這位歡樂大師的gems of wisdom。
(一) 世事冇永恒,煩惱亦然。
(二) 一天不笑,就浪費生命!
識得笑,真可以救自己、救地球!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
全新節目《說說心理話》青少年不可以戀愛!?真實個案講述驚心動魄經歷► 即睇