• |
  • 極速報價
  • |
  • 會員
  • 產品服務 / 串流版
  • 設定

29/12/2016

明年桃花旺 東南有喜氣 正東有財氣

  • 加入最愛專欄
  • 收藏文章
  • 黃美雲

    黃美雲

    黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

    黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

    曾以黃愛媚的筆名,在報章雜誌撰寫專欄,出版的書包括《公關十八般武藝》。

    本欄逢周四更新

    玄來更精彩

  丁酉年桃花開得燦爛,如果府上大門又在東南,咁就真係人見人愛、車見車載咧,要好好利用這一年,培植姻緣人脈,不要辜負那雙春兼潤月。

 

  要放大這綺麗磁場,勇的可放九朵紅艷,要水養鮮花,若慳皮用膠花絲花紙花乾花,後果自負,唔知會惹埋D乜嘢人埋身!唔想踩咁行油,可以用渾圓紫晶或紛紅晶,溫柔啲、擴散性咁發揮魅力,吸佢埋嚟!

 

 

  除咗大門在東南,若睡房門、床頭在這方位,全部有SO。

 

  東南也是喜慶位,除了拍拖、結婚等喜事外,亦可能有添丁、升職加薪、被人高薪挖角等好消息。

 

  講完人緣講財路。財星八白在東方,這是當旺的財星,在八運(2004-2023)大顯神威,但這方位明年同時有三煞,即財來自有方之餘,財來亦有麻煩,所以明年不宜大力摧財,唯恐富貴逼人來,麻煩亦跟住來,可能被人攞上枱、篤背脊,甚至有官非等。這正好應了紫微斗數酉年太陰(財星)化祿和巨門(嗌交星)化忌的矛盾孖寶,因此今年要搵錢,就宜採用多方面思維模式,想得周全啲,無謂有手尾跟啦!

 

  東方八白旺事業、東北四綠則旺學業。今年要考試、爭取專業資格、甚至BB打崩頭入學前名校‥‥‥‥等等,若在東北方位讀書、溫習、遊戲、睡眠‥‥‥‥都可能順利啲。想去盡啲,有人放文昌塔、有人放四季竹,要四枝翠綠水植品種,花瓶最好也選綠色。

 

  從玄學角度看,是否發大財、或發科名之舉,都不是最重要,最緊要是不要發生事故,所以每年最關鍵係「目及」住五黃星飛去邊,呢粒災星病符舊年落在東北,結果北韓失驚無神玩核、南韓則爆閏密門、朴槿惠一身是蟻,民眾差不多每周末都上街抗議,所以五黃真係唔嘢小。明年此星在南,中國之南有印度、澳洲,甚至星馬泰菲也入圍,各位去旅行要小心呢D地方。若家中大門、睡房門、床頭在南,切記在這些位置不要動土。至於化解方法,最大路係放安忍水(見本欄安忍水有幾安穩?一文。 ),最慳水慳力用大銅錢,幾十蚊有交易。

 

  五黃大大劑,二黑亦未必濕濕碎,雖然災害病情規模較小,但專「蝦」年長女性,此星雞年落在西北,亞嬸亞姆亞婆要小心咧。

 

  另一要留意的方位是太歲位,在正西、又兼是三碧位,喻是非、口角、訴訟,所以此方位絕對宜靜不宜動,如屋外太歲位(西)或五黃位(南)有動土工程,切記要落哂窗簾,就算係無敵海景,一於冇眼睇,保住條命仔先。

 

  記住:正東與東南有契機、正南與西北有危機,大家真係要睇位呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生