• |
  • 極速報價
  • |
  • 會員
  • 產品服務 / 串流版
  • 設定

21/06/2018

【佛系生活】歎世界定捱世界?各有前因早注定

  • 加入最愛專欄
  • 收藏文章
  • 黃美雲

    黃美雲

    黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

    黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

    曾以黃愛媚的筆名,在報章雜誌撰寫專欄,出版的書包括《公關十八般武藝》。

    本欄逢周四更新

    玄來更精彩

  開完back-to-back meetings,個頭wing wing地,立即去睇我喜愛嘅中醫。喜愛,係因為佢除咗好醫術之外,仲好攪笑。

 

  「呀!師伯!你結果都嚟咧!」佢一見我就叫。

 

  點解叫師伯?因為我細佬係佢個女嘅太極老師,大家有一日在醫館狹路相逢,佢地就研究要如何稱呼我。

 

  「嗱!唔好叫師姑呀……咁喇,叫師伯啦。」我自出套路。

 

  於是我就喺醫館變咗性咧。

 

 

  醫師把完脈,好熟練咁下針。

 

  「究竟我係乜嘢病呀?」我喺變成箭豬嘅過程問。

 

  「虛火上升啫。過勞囉。喂!你係咪擔泥㗎?」佢開玩笑。

 

  「唔係擔泥,係好多嘢擔心。都唔知點解咁忙,我覺得我唔係人嚟嘅,係隻牛!」

 

  「我有個秘密話你聽。」佢細細聲講。接住話:

 

  「你知唔知,香港啲牛係唔駛做㗎?」

 

  「係喎,佢地淨係負責遊蕩同食草咋喎。咁我要重新定位咧!」我表示好受佢啟發。

 

  佢好高興我咁受教,再接再厲。

 

  「你應該學吓我個女。」

 

  「係。師侄點呢?」

 

  佢就敘述其千金幾咁識歎。

 

  老豆有一日問個女有乜理想。答案係:

 

  「一畢業就退休!」

 

  不久,個女睇見老爹做到好夜都未食飯,就問:

 

  「老豆,呢排咁遲都未收工嘅?」

 

  「係呀,要準備退休金嘛。」

 

  「都唔駛咁搏命㗎!」

 

  「我要為我同你退休籌款嘛。」老豆煞有介事咁答。

 

  個女唔係幾好意思,細細聲話:「我嗰份細細地得㗎咧,我係佛系嘅。」

 

  「我係被佛系嘅。」老豆答。

 

  無論佛系定財系,要歎定要捱,好多時都早有前因,一打開副八字就一目了然,要捱一族,多數身弱而缺生扶,或者大運流年遇唔到用神,全部食自己!歎嘅幸運兒,就身旺有洩或尅、身強傷官生財,或身弱有印幫身、用神得力等。

 

  如果以上太複雜,咁生於西曆一月八日至二月四日,即舊曆十二月,正是隆冬the depth of winter,無木無火,生機微弱,就多數辛苦啲。不過可能意志較堅強,因為遇慣逆境,往往有成就。

 

  再簡單啲,就係睇吓老豆咧!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生