• |
  • 極速報價
  • |
  • 會員
  • 產品服務 / 串流版
  • 設定

24/08/2017

手機App其實係點賺錢?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  而家每個人嘅手機入面閒閒地都有百幾個App,新聞、即時通訊、遊戲、工具app樣樣齊,從而令好多人都想靠諗隻App出嚟賺大錢。今次淺談現今手機App市場最普遍嘅賺錢模式。

 

 

免費下載(in-app賣廣告)

 

  其中一個最普遍嘅模式,由於唔駛錢就可以下載,所以比較容易儲到一大班用户。App嘅開發商可以從呢班用户收集資料數據、用户喜好等,之後再賣具針對性嘅廣告,Facebook係一個好好嘅例子。

 

免費下載(付款獲得更多功能)

 

  同樣先以免費下載吸引用家,然後再畀用家試用(或試玩)大部分功能。用家如果想獲得更多功能,就要畀錢in-app購買。早前任天堂推出嘅Super Mario Run,佢先畀玩家試玩頭幾關,如果想要Full Version,玩家就要畀$78。當然玩家畀錢後嘅得著是否吸引,係upsell成功與否嘅關鍵。

 

 

訂閱模式

 

  呢類型嘅app會先免費提供一定程度嘅內容,如果用戶想睇多啲內容,就要畀訂閱費用。呢個模式可以令開發商定期有收入,但佢哋亦需要提供穩定而具質素嘅內容,以留住用戶。畀咗錢嘅用戶亦會對隻app比較「忠誠」,傾向定期打開隻app。早前有外國調查顯示,面對較低嘅訂閱費用(約$8-$56),用戶會用大約15分鐘去決定畀唔畀錢,而面對較高嘅收費(約$160-$400),用戶就需要大約22小時去考慮。而女性比男性更傾向畀月費去睇更多佢哋有興趣嘅資訊。

 

 

收費App

 

  用戶需要先畀錢,然後先可以下載隻App。呢種模式嘅難處在於要讓消費者喺眾多免費app之中,睇到你嘅價值(做法可以包括Word of Mouth、媒體宣傳、靠App Store五星星用戶評級等)。當用戶畀錢下載之後,佢哋一般嘅使用率都會比較高,始終畀咗錢,點都會用多啲。有機構做過調查,大部分要畀錢嘅app,每日下載次數都唔會超過500次,所以要從賣App直接賺錢,突出隻App嘅Value Proposition非常重要。

 

贊助式廣告

 

  App會同其他公司合作,當用戶喺app入面完成某啲指令,贊助商就會送出獎品畀用戶。呢種模式嘅app其實就係一個「媒人」,從贊助商收取「媒人費」作為收入,而贊助商從中可以得到廣告機會,而用戶又攞到著數。而另一種常見「媒人app」,就係製造一個平台,為用家同Service Provider提供配對服務,香港嘅佼佼者有GoGoVan。

 

  以上只係幾種較為普遍嘅賺錢模式,而好多app都係喺推出之後,再從"Trial and Error"搵出最適合自己嘅賺錢模式。如果你都想創造自己嘅app,睇多啲人哋嘅發展故事,了解競爭對手嘅弱點,可能就係你嘅致勝關鍵。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App        財智‧健康‧品味生活
【立即下載】
iOS版: http://goo.gl/5qT9Op
Android版: http://goo.gl/nc3xAn
我要回應

你可能感興趣

  • 生活副刊
  • DIVA
  • 健康好人生