• |
  • 極速報價
  • |
  • 會員
  • 產品服務 / 串流版
  • 設定

25/01/2018

【社交媒體大革新】開設企業版,WhatsApp走向微信化?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  有冇數過你自己一日會打開幾多次WhatsApp?噚日我數過,有18次。

 

  如果要你兩三個鐘唔打開WhatsApp,我諗有好多人都會如坐針氈,內心感覺痕癢。WhatsApp的確係大部分香港人不可或缺嘅日常溝通工具。但作為一個普遍使用嘅app,佢亦係一個少有用作宣傳嘅平台。

 

  唔知大家有冇試過無緣無故被陌生電話號碼加入WhatsApp群組,然後被迫睇一堆宣傳補習或其他傳銷內容?我相信大部分人收到呢堆訊息嘅反應,都係即刻離開群組,然後刪除對話。宣傳效果收唔到之餘,亦令人反感。咁有咩方法先可以喺WhatsApp做宣傳?

 

 

  WhatsApp自2014年被facebook以190億美元收購之後,不斷加入新功能,例如WhatsApp Call、即時位置分享(live location)等。最近,WhatsApp更喺英美、意大利、印尼等市場推出一個企業試用版,主打幫助中小企同客戶溝通,幫助企業宣傳。

 

  WhatsApp企業帳戶(business account)功能包括設置公司專頁、自動回覆訊息、分析客戶對話數據及用戶喜好等,務求吸引更多企業利用WhatsApp作為客戶服務平台,撇除電話、電郵、網站等舊有渠道。

 

  推出企業帳戶其實同facebook近來減少品牌內容曝光率嘅方向大致相同。打開facebook,大家應該不難發現廣告或贊助內容愈來愈多,漸漸失去原本社交、聯誼嘅功能,令捨棄facebook嘅趨勢加劇。Mark Zuckerberg兩星期前發文指,將減少品牌、媒體內容出現喺動態消息(News Feed)嘅比例,重新著重朋友與朋友之間嘅內容互動,希望撥亂反正,重拾社交媒體本意 — “help us connect with each other”。

 

  WhatsApp企業版正好將各品牌嘅客戶服務同宣傳力量,慢慢分流到呢個即時通訊軟件平台之上。尤其要同較年輕受眾溝通,改用即時通訊軟件可能更為直接。(Marketer面對Facebook零reach的對策,詳見另一文章

 

  WhatsApp推出以來大部分時間都係免費使用,只有短時期曾經要收取$8(美元$0.99)年費,結果引起極大反彈。最終2016年宣布取消收取年費。而家推出企業版,無疑可以為WhatsApp增加收入。WhatsApp計劃發展更多服務,包括app內付款。故事繼續發展落去,其實離WhatsApp「微信化」又行近一步。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生