• |
  • 極速報價
  • |
  • 會員
  • 產品服務 / 串流版
  • 設定

11/10/2018

【唔好做鹹魚】夢想邊有分高低!「無忘初衷」可能更快樂

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  讀小學時,Alfred有一個夢想,就係要食好多好多機智豆。

 

  無錯,就係讀書嗰時小食部賣$1.5一包,小息(同上堂時)必食嘅阿華田糖。因為佢好鐘意食,所以細個嗰時佢立志要有至少一個游泳池咁多嘅機智豆,然後請晒全班同學返嚟一路「游機智豆水」,一路食。

 

  Alfred呢個夢想好低b、好可笑?未算。

 

  讀大學時,Alfred連續兩年贏咗書院歌唱比賽冠軍,所以佢當時嘅夢想就係做一個全職歌手。讀U嘅三年間,佢不斷錄demo寄畀唱片公司,不斷參加各大小歌唱比賽,就算走堂、低GPA亦在所不計。

 

 

  Alfred呢個夢想好低b、好可笑?未算。

 

  剛踏入職場,對社會、對金錢有多咗認識,同時受身邊人薰陶,Alfred嘅夢想就變成要搵好多好多錢。Alfred不斷OT、不斷力爭上游,只希望得到更多金錢、希望買到樓,然後獲得更多人尊重。

 

  Alfred工作十年,靠自己雙手搵到五十萬,希望同女朋友搬出嚟住。同經紀四圍睇樓,然後發現深水埗一個250呎開放式單位,竟然要耗盡自己(同父母)嘅畢生積蓄。

 

  所以佢退而求其次,搵更細嘅單位做上車目標。最終,畀佢搵到一個佢(同佢父母)負擔得起嘅粉嶺單位,實用面積240呎。

 

 

  第一晚同女朋友搬入去住,Alfred並無感受到想像中嘅興奮,反而覺得後悔同內疚 —— 後悔係因為自己畀咗成份積蓄去做首期,其實點解?內疚係因為用咗父母大部分積蓄去裝修,其實為乜?三個人畢生嘅汗水、金錢就擺咗喺呢240呎裏面,仲要困身三十年。

 

  雖然Alfred總算達成長大後嘅「夢想」,但佢一啲都唔快樂。而家擁有一個240呎單位嘅心情仿佛比唔上用廿蚊買十幾包機智豆,然後一次過食晒佢咁開心。

 

  有啲錢洗咗會令你開心,但有啲錢洗咗反而會令你擔心。洗錢多少同你有幾開心亦未必一定成正比。

 

  夢想未達成,未必會令你時刻感覺失落,因為喺追夢旅途中,你每一日都有繼續向前行嘅動力,你會因為自己向前踏出一小步而獲得滿足感。

 

  一個夢想係咪低B、係咪可笑,全屬個人判斷。無忘初衷,你可能活得更快樂。

 

  夢想,切忌隨波逐流。

 

全新【etnet健康】專頁登場喇!立即成為Fans獲得最貼身實用嘅健康資訊! http://fb.me/health.etnet.com.hk
我要回應

你可能感興趣

  • 生活副刊
  • DIVA
  • 健康好人生