• |
  • 極速報價
  • |
  • 會員
  • 產品服務 / 串流版
  • 設定

13/12/2018

【人生伙伴】打工仔漂浮職場四十年 最緊要搵到「人生伯樂」助你跳出樽頸位

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  世界冠軍運動員都需要一位教練,所以就算你幾能幹都好,有一位好前輩或者伯樂與你同行係必需嘅事。喺職場上,搵一位好上司/好同事,比搵一間好公司更為重要,尤其當你工作去到一個唔上唔落嘅階段,可能會因為伯樂嘅一句話,已經能夠幫你跳出多年來嘅樽頸位。

 

  伯樂通常分兩類,喺工作上教你智識、提攜你嘅人,係「工作伯樂」。工作伯樂多數係你嘅上司或者老細,但上司/老細就唔一定係伯樂。好多人可能工作多年,跟過無數上司,好嘅上司最多只係錫你、幫你,令你工作上有小甜頭,但未必長遠,所以好上司亦都未必一定係伯樂。

 

  真正嘅工作伯樂,係能夠引導你去下一個階段。下一個階段有時未必一定係指升職,可能佢喺公司觀察到你已經到達樽頸位,唔希望你留喺公司而停滯不前,所以會真心地勸你離開,幫你搵新工,希望你有更好發展,呢啲就必定係好嘅工作伯樂。

 

 

  而另一種係「人生伯樂」。同樣地,佢未必一定係你上司,可能只係坐喺你旁邊一位普通同事。工作上佢未必幫得上忙,甚至唔會同你分擔工作,但佢會給予你思想上嘅啟發,改變你人生觀。通常人生伯樂睇事物嘅角度/方式同自己好唔同,但呢一種不一樣就不停為你腦袋帶來衝擊,令你知道OT並非單單只係諗如何完成工作,亦要思考OT價值何在;教你如何評價上司,為將會成為上司嘅你作準備;啟發你看事物嘅新角度同處事方式,令你看得更遠更廣。呢類人喺職場上有好多,只係你未必經常發覺,或者你會當佢哋係古怪同事,但其實佢哋經常不經不覺間帶你進入另一個新視野。

 

  職場四十年,伯樂有時唔需要太早出現,太早得到伯樂嘅幫助反而可能會有反效果,因為太多嘅提點同啟發,就會變得慣性而令自己缺乏自我提升嘅能力。但相反,如果你久久未遇上伯樂,就要諗下是否自身出現問題,是否待人接物有不足之處,伯樂經過亦令其卻步。或者係處事固執,佢哋想幫亦幫不了。

 

  伯樂好難遇到,就算遇到亦未必長時間陪你走每一個階段,可能佢哋辭職比你早,亦可能係你已經比佢行得更遠。就算係大家將來無再喺同一間公司工作,但都唔好放過呢段關係,間唔中嚟一個有養份嘅聚會,由工作/職場上嘅伯樂,變成人生伙伴。

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生