• |
  • 極速報價
  • |
  • 會員
  • 產品服務 / 串流版
  • 設定

13/02/2020

【顏色消費】「黃色經濟」凝聚同路人消費,會否令經濟失衡?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  近期經常出現「黃色經濟」一詞,有評論指黃色經濟會喺未來幾年主導香港嘅大方向。黃色經濟當中包含兩個重點,第一係罷買/食/幫襯藍色商店,第二係只買/食/幫襯黃色商店;當兩者同時間發生時,會否令經濟出現失衡?其威力真係可以影響未來幾年嘅經濟?

 

  從商業角度睇,商店開門做生意必定係為咗賺錢,而黃/藍色只係佢哋賺錢過程中其中一個標籤,當呢個標籤大過佢哋本身商店產品/服務質素嘅好與壞時,顧客可以唔理佢哋嘅午餐有幾難食、唔理服務態度有幾差,都願意排隊幫襯,就表示佢哋係畀錢係買緊一個品牌,唔係買緊產品嘅本義,而黃/藍色呢個標籤就慢慢變成一個品牌效應。有人會質疑市民盲目地去追隨呢個品牌,直指市民無知,係一個錯嘅消費方法。但其實同類嘅事情日日發生,如Fans追隨明星、時裝愛好者追隨單一品牌、球迷追隨球隊/球星一樣,並無對錯。

 

  標籤化除咗令市場短暫失衡、產生另一種消費取態之外,同時呢種品牌效應亦會形成一個community(小社區)。因為呢類嘅消費者相信,同「同路人」一齊食飯,可以唔駛聽到唔想聽嘅聲音、唔會睇到餐廳內唔想睇到嘅電視節目;畀錢去享用呢個環境,更突顯呢個community嘅存在同價值。當品牌加上community,就係對競爭對手嘅一種短期壓力。

 

  「短期」係因為活動終有一日會完,結束後只會得小部分人仍然堅持呢種消費模式,長則可能一年半年,短則一兩個月後已經打回原形。對出名善忘嘅香港人嚟講,黃色經濟嘅持續性可能唔會好耐,生命周期較短,但另一方面,其實佢嘅復活能力係十分強。今後只要有社會意見上嘅分歧,或者商店/公司員工/代言人嘅言論較為突出時,類似嘅品牌效應同消費模式或會因而再次掀起,community又會再之形成。因為大家知道,喺香港商業競爭激勵嘅環境下,以經濟層面作攻擊,遠比唇槍舌劍更為有用,亦係呢種另類community強大之處。

 

  當然,有部分商人會以黃色經濟作為商業策略多於品牌,用「賣黃」去招財,甚至呃人。其實每個人、團體、公司,以至係一個官員都有自己嘅品牌,有自己嘅商業策略,甚至會有自己嘅community。而重點係,你用乜嘢策略去建立一個屬於你嘅品牌,凝聚同路人成為你community嘅一分子,並非凝聚一班憎你嘅community,被社會埋怨。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生