• |
  • 極速報價
  • |
  • 會員
  • 產品服務 / 串流版
  • 設定

28/05/2020

【有危就有機】重衛生?愛網購?消費者生活模式改變,要把握疫後新轉機!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    我做Marketing

    本欄每周四更新

  經此一「疫」,消費者嘅生活模式改變,消費習慣亦跟隨改變。就算幾個月、幾年後疫情100%完結也好,好多人、好多國家對生活上嘅不同事情都會有好大轉變。例如,可能大家會愈來愈注重衛生,做每件事都會以衛生為首要前提,又或者以前大家網上購物多數只係買機票、酒店、限量版波鞋等等,但之後會較集中於生活必需品。雖然有啲地區唔太適合某種新嘅生活模式,但最後都被迫習慣,又或者係出現新一套嘅演繹方法,而呢啲就係疫後新轉機。

 

體驗價值

 

  近幾個月叫外賣嘅人次大增,對食客嚟講「屋企」嘅價值慢慢提升,實體餐廳看似變得可有可無。一間普通嘅茶餐廳,佢哋嘅生炒牛河好受歡迎而吸引好多客到店幫襯,但疫後大家習慣叫外賣,因為自己屋企嘅衛生環境相對比茶餐廳好,到店幫襯只會愈來愈少。又例如時裝店,如果可以網上購物係可以免費refund的話,到店幫襯近乎係冇呢個必要。

 

  所以好多人話疫後實體店已經冇存在價值,有公司開始計劃完全放棄實體店,我只能認同一半,因為就算online嘅技術有幾發達,有啲事情短時間係好難被取代,例如餐廳侍應嘅人情味、顧客同產品之間嘅互動、環境提供嘅官能體驗等,都可以係一種好獨特嘅賣點。就好似當年電影業因為非法下載而大受打擊,但3D立體電影技術嘅出現,令戲院入場人次再次上升。而另一方面,香港係一個較為方便嘅地方,上街shopping、「唔買都嚟睇下」,亦係香港人獨有嘅樂趣之一。所以老闆們重點唔係要即刻結束實體店嘅生意,亦未必係一面倒諗如何將所有業務online 化,而係計劃如何為實體店重新定義佢嘅價值同功能,打通線上線下,再配合自己生意嘅特質,創造出一種新嘅另類體驗比消費者。

 

一對一交通工具

 

  因為衛生問題,大家會避免搭公共交通工具,所以負擔得起又冇私家車嘅消費者,可能會多咗選用一對一嘅交通工具,如的士、電召車等,能夠減少對人接觸嘅同時,點到點往來亦較為方便。但呢類交通工具都相對地貴,所以之後有機會出現兩個變化。

 

  一對一交通工具會出現貴版同平版,將價錢慢慢推開,冇咗中價位嘅生意,一來可以用高質服務吸納高消費、唔想買車嘅錫身顧客,二來亦可以照顧到只係想間唔中有需要、低消費力嘅顧客。另外,單車、電動自行車、滑板車會普及起來,相信會有更多租借服務去迎合較低消費力顧客,亦可能喺不同地方推出泊車、暫存服務,以方便上班一族。

 

Hygiene Everywhere

 

  以前大家就算出入醫院等高危地方時,都未必會戴口罩,但今時今日,只要有人喺車廂內咳咗一下,戴咗N95嘅你都會即刻離開車廂。當然疫後呢個情況一定冇咁誇張,但大家都必定會比以前更注重衛生。亦因為咁,喺唔同情況下將可能出現一套全新嘅衛生安排同產品。

 

  除咗醫院、診所外,飛機相信係暫時最高危嘅地方之一,疫後大家搭飛機時,都會好注重乘客、空中服務員、飛機設備等等嘅衛生問題。到時可能會出現一套專為飛機、餐廳等地方而設嘅衛生設置。除咗口罩同消毒用品外,有公司已經開發緊「免接觸」電子產品,巿面上亦有好雛形嘅口罩 / 消毒用品自動售賣機,好多大大少少新嘅產品 / 服務同周邊亦會出現。當然大部分人唔係科學家,未必識設計、研發新產品,但好多因為衛生問題而出現嘅事情,而該事情再引發出嘅產品 / 服務,相信大家都可以做到。

 

  老套講,有危有機。喺避免唔到嘅情況下,結業可能係一個方法。但香港人出名處事靈活變通,就算事情有幾困難,環境有幾亂,我哋都可以迎難而上。 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

你可能感興趣

放大顯示
師傅靈靈法

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ