• |
  • 極速報價
  • |
  • 會員
  • 產品服務 / 串流版
  • 設定

05/11/2020

【經濟轉型】Slash一族、自由工作者,可能是新時代贏家!

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  好多人對自由工作者(freelancer)呢份職業唔太睇好,覺得收入唔穏定、長遠冇保障、賺得少、冇前途等等。但其實近年經濟轉型,再加上疫情嘅打擊,可能佢哋先係新時代嘅贏家。

 

  大部分公司上年開始已經實行開源節流,但老闆們先唔會談開源,只談節流,第一件事就係cut budget,之後就係cut benefit,最後就cut 人,cut完一次後又會再次循環。好多公司轉型唔夠快最終面臨結業,人才不斷散落巿場,造成好多自由工作者。另一方面,打工仔為增加自己嘅防守性,一人多職嘅情況已經十分普遍,令Slash人口不斷有增無減。

 

  Slash呢個字相信大家都唔陌生,隨著近年網絡生意同社交媒體急速發展,就算有固定職業嘅打工仔都可能同時間有幾份part time,幾個同正職近似嘅身份,就算連自由工作者近年亦有分半/全/多職。早年一份美國統計指,美國大約有五千多萬名自由工作者,佔整體勞動人口三分一。佢哋主業最多為程寫編寫員、作家、設計師、IT support等等,而估計當中亦有好多係一人多職。一人多職嘅自由工作者「轉身能力」同比別人高,極適合現今經濟不穏嘅大時代,長遠嚟講佢哋較有優勢。不過「人人都想做自由工作者,唔通人人都做到自由工作者咩」,要做好Slash一族或者係自由工作者,最重要了解自己嘅價值。

 

  做生意永遠都係講價值,任何事只要有價值就有商機。自由工作者嘅價值,就係自己本身,能夠發揮多於一項自身價值,你嘅slash版圖就愈豐富。但實情係,打工仔又好,自由工作者又好,好多人潛意識地認為工作係「用時間換取金錢」,而現實生活中大多數人真係「賣時間」俾公司,無意間被偷走咗自己勞動後嘅剩餘價值,賺少咗錢之餘亦得不到快樂。

 

  隨著時代轉變,愈來愈多自由工作者會以自己嘅興趣作主業,所謂「時薪」慢慢會變得冇意義,因為回報已經唔只係金錢,快樂亦係其中之一。只要找到對的工作,就能重新定義自己職場上勞動價值。如果要令價值提升,其實每一位自由工作者唔應該以「人」為單位,要以「公司」為單位,你同公司嘅價值就會連成一線。所以當你收到客戶嘅新工作時,已經唔再係為佢「打工」,而係「合作」。同時間你同其他自由工作者亦可建立「合作」關係,大家唔再係「一人公司」,而係一個community,近年租用共享辦公室內嘅老闆們,經常互相產生新合作,擴大自己/公司slash嘅版圖。

 

  不論事情有幾困難、環境有幾亂,可能日後會有更多裁員潮,相信香港人依然係適應能力最高嘅一群,能夠不斷逆流而上,令自己嘅價值不斷提升。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【先到先得】訂閱etnet YouTube Channel,即可獲贈咖啡禮券!► 立即行動

我要回應

你可能感興趣

放大顯示
  • 生活副刊
  • DIVA
  • 健康好人生