• |
  • 極速報價
  • |
  • 會員
  • 產品服務 / 串流版
  • 設定

03/06/2021

別完全相信「我鍾意大家講真話」!敢怒敢言等於無禮貌?邊兩種同事最易失禮人?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  「禮貌」,係返工其中一張必備嘅員工證,但同時間亦係職場上最多人唔肯學習嘅課題。最常見嘅「失禮同事」有兩種:職場old seafood、名牌大學/較有能力嘅畢業生,分別在於前者知道對方嘅底線,再用言語向你嘅底線進發,而後者係佢哋唔知道對方嘅底線,仍會從多角度向你嘅底線進發。

 

  以職場初哥為例,部分人經常認為只要自己有實力,其他嘅事情都唔再重要,面對上司要「敢怒」、面對老闆要「敢言」,如果事情正確,有話直說有何不可;亦有好多自以為能力較高嘅職場初哥,自覺係公司拔尖,加入公司係公司嘅榮幸,會以白鴿眼視人,說話亦欠禮貌。最可悲係,有時連HR同上司們都係因為老闆鍾意能力較高嘅同事,所以會對佢哋多番忍讓,最後令無禮貌變成常態。

 

  其實敢怒敢言、無禮貌嘅同事,職場上通常會各走極端,一係升得好快,一係就走得好快。老闆鍾意呢類員工,因老闆們覺得敢言嘅同事對公司會有正面影響,但以言語踐踏底線嘅行為通常只會有增冇減,當去到某個關口自知出事嘅時候,可能已經太遲。第一次老闆會欣賞你能力同敢言,會「欣賞你」,但再過多幾次,呢個能力就會喺老闆面前失效,因老闆口中「我鍾意大家講真話」,其實只係選擇性嘅真話,最後唔再「忍你」。結果係你嘅肆無忌憚引來眾人反感,到有一刻你再冇價值嘅時候,你所失去嘅可能比你想像更多。

 

  一個團隊,永遠都追求一個synergy,希望所以事情都可以做到「一加一等於三」,要做到呢個效果,你先係團隊其中一員。禮貌其實係溝通技巧之一,而團隊中「溝通」往往比「個人能力」更為重要、更能產生synergy。千萬唔好潛意識覺得老闆只請「聽話嘅同事」,而否定咗有能力嘅人唔可以敢言。而係如果你有能力的話,更要諗深一層如何有效能地傳達訊息,敢言係可以同有禮貌並存的。緊記,禮貌並唔係一種能力,而係一種必要嘅「習慣」。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【搶先申請】免費試用etnet強化版MQ手機串流報價服務! ► 立即行動

我要回應

你可能感興趣

放大顯示
周一加油站

精選文章

  • 生活
  • DIVA
  • 健康好人生