• |
  • 極速報價
  • |
  • 會員
  • 產品服務 / 串流版
  • 設定

10/01/2019

【港航危機】小薯心聲:港航執笠,我就可以搭其他Airline出Trip啦!

  • 加入最愛專欄
  • 收藏文章
  • 玄米米

    玄米米

    生於1月18日,外在人格更傾向水瓶的山羊女。表面活潑、接受新事物,人際關係得心應手;實情內裡木木獨獨、抗拒social,寧願少一事也不伸張正義的中環OL。

    花生味辦公室

  近排生果報日日咬住港航唔放,大肆報道港航欠債嘅新聞,仲話港航隨時執笠,令到全港市民人心惶惶!(緊係喇,香港人唔食都要去旅行,你失驚無神執左笠,我要餓多幾多餐早餐先買得返另一張機票?)事先聲明,我對港航無反感的。一直都認為有選擇,點都好過冇選擇,個人遊唔洗吓吓捱貴食魚翅,可以執到平機票去個budget trip都係好事。所以假如港航真係執笠,我忍唔住笑到gap gap聲的原因,並唔係港航嘅問題,而係我返工終於有好日子過喇!

 

 

  唔知大家公司出trip要點做,但我公司出trip制度嘅不公平就好懸殊!雖然大家都係為左同一件事出trip,但高層出trip可以揀航空公司、甚至有啲職位係可以揀坐咩等級嘅座位;而薯仔們就必需由秘書貨比三家,有時仲要自己做埋秘書嗰份,揀間價錢最低嘅公司,更唔好講可以揀等級,所以好多時港航都會係我地常搭嘅航空公司。(有人會問:撘廉航(LCC)咪仲平,起碼港航都仲係full service carriers啊!其實因為撘LCC嘅行李、飛機餐全部另計,公司要預budget就更麻煩,況且2間公司個價都唔係差好遠。)

 

 

  但都係果句,人係有情感嘅,見到明明大家都係打工,點解待遇可以咁唔同。一方面自己個心條氣唔順,覺得「真係高層大哂咩?」,另一方面又死死氣認命,鬼叫自己係薯仔,人地擺到明恰你、唔尊重你,你都冇Say。所以,當港航業務宣布有危機時,薯仔除左會擔心自己啲機票仲用唔用到之外,相信暗暗都會有一絲喜悅。因為只要冇左港航,而家出Trip仲唔到我地坐其他航空公司,例如國泰等等。你話我冇鬼用都好,但都叫同大家拉近左距離喇?

 

  除左可以坐好啲,其他原因都係同自己公司有關。例如希望突如其來嘅執笠,(妄想)有機會可以唔洗賣身去business trip,蝕假又蝕精神;另外假如因為航空公司執笠,公司傾唔成生意,老闆賺少左錢,我個人個心理狀態又會舒暢少少;甚至見到公司畀航空公司走數,蝕哂啲已找數嘅機票錢,睇見黑人憎嘅老闆煩惱,我又會開心左一下。我深明「老闆唔高興,你都唔會有好日子過」呢個道理,但係「我得5粒魚蛋,你唔可以有6粒魚蛋」!上司及腦細們,一齊跟住呢間航空公司墮落吧!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生