隨著人工智能（AI）愈來愈成熟，機械人嘅應用範疇亦愈來愈廣。最近小編就留意到，德國有間教堂推出咗一款「BlessU-2」機械人牧師，可以向信徒會眾自動送上祝福。嘩！連牧師咁神聖嘅工作都可以取代？唔通霍金個句「50年內，AI 人工智能全球流行，屆時全人類都會面臨失業」嘅警告將會加快應驗？

「BlessU-2」機械人牧師

　　據了解，呢款「BlessU-2」機械人牧師設有5種語言選擇，包括德文、英文、西班牙文、法文和波蘭文。只要信徒喺機器人心口位置嘅屏幕上選擇想聽嘅語言，再選聽男聲或女聲，BlessU-2就會送上「願耶和華賜福予你，保護你」嘅祝福。不過事件亦引來部分教會人士批評，直指機械人唔應該亦冇可能取代到真人牧師嘅工作！

　　究竟AI係咪真係可以成為「萬能打工仔」，取代晒人類嘅工作？去年10月，世界經濟論壇發表報告指，2020年各職業將會逐漸被AI取代，其中包括文書及行政工作、建造及生產工作、文字寫作及娛樂，甚至是法律相關工作；而企業策劃、管理階層工作、建築工程、銷售以及教育及培訓工作就較難被取代。

　　同月，2010年諾貝爾經濟獎得主克里斯多福‧皮薩里德斯（Christopher A. Pissarides）亦指，雖然未來會有唔少工作被機械人「按個掣」取替，但心理諮商師、職場治療師、營養師、外科醫生手術人員和牧師，絕對可以喺AI世代立足，皆因呢幾份工都需要「人與人面對面、和心靈接觸」，機械人冇可能隨便取代到，即使佢哋受過再好嘅訓練都係咁話！

Installation "BlessU-2" / LichtKirche Wittenberg (Segensroboter / Blessing Robot)