你有冇諗過自己要賺到幾多錢先會快樂？最近小編留意到BBC有篇報道指，美國普渡大學（Purdue University）心理科學系研究員Andrew Jebb領導咗一項民調，訪問咗嚟自164個國家，約170萬個打工仔，計算出各地嘅「最快樂年薪水平」。

　　研究人員主要問兩個問題：

　　1. 有幾多錢你先會快樂？

　　2. 錢要多到乜水平，你會開始無感覺？

　　最後Andrew Jebb發現，全球平均最快樂年薪大約為9.5萬美元，換算後亦即74.1萬港元（月薪約6.1萬港元）。不過最令小編意外嘅係，一向崇高悠閒生活嘅澳洲和新西蘭，竟然係對「最快樂年薪」要求最高嘅地方──一個人嘅年薪要有12.5萬美元，即97.5萬港元（月薪約為8.1萬港元）先會感到快樂。Andrew Jebb解釋：「喺較富足地區，滿足生活嘅金錢需求就更高。而且人喺評估快樂年薪嘅時候，往往會同其他人做比較，結果就受到人嘅影響。」

　　調查同時指出，賺得愈多嘅人唔一定愈快樂，甚至可能會有副作用添！因為人滿足咗基本生活所需後，就會開始產生社會階級疑慮，在意同其他人做比較，久而久之令自己冇咁快樂。

阿里巴巴董事局主席馬雲曾表示，「一個月賺一、二十個億其實很難受。」

　　香港又點？原來位於東亞地區嘅香港，最快樂年薪為11萬美元，即約85.8萬港元（月薪約7.2萬港元）。嘩，要月入7萬幾先可以快樂，咁睇嚟小編有排都會唔快樂喎……

　　但其實快樂真係同金錢掛勾咩？小編諗起呢個細細個就已經聽過嘅故事──有一個富翁喺海灘度假，望見有個貧窮嘅漁夫喺佢身邊同樣好悠閑咁曬太陽。富翁感到不可思議，於是忍唔住問漁夫：「你點解唔去做嘢呀？」

　　漁夫：「我已經做完嘢返嚟啦。」

　　富翁：「咁你唔捕多一船魚？」

　　漁夫：「今日打上嚟嘅魚已經夠我一日用啦。」

　　富翁：「咁你都可以打多啲魚，賺多啲錢嘛！」

　　漁夫：「要咁多錢做乜呢？」

　　富翁：「買更多隻船，打更多嘅魚，建立自己嘅船隊和航運公司，做百萬富翁！」

　　漁夫：「做咗百萬富翁又點樣？」

　　富翁：「咁你到時就可以咩都唔駛做，瞓喺海灘曬太陽啊。」

　　漁夫哈哈大笑：「我而家咪喺度曬太陽囉。」

世界各地最快樂年薪（美元／港元）

　　▶全球：9.5萬／74.1萬（即月入6.2萬港元）

　　▶澳洲／新西蘭：12.6萬／97.5萬（即月入月：8.1萬港元）

　　▶中東／北非：11.5萬／89.7萬（即月入7.5萬港元）

　　▶東亞：11萬／85.8萬（即月入7.2萬港元）

　　▶北美：10.5萬／81.9萬（即月入6.8萬港元）

　　▶西歐／斯堪的納維亞：10萬／78萬（即月入6.5萬港元）

　　▶東南亞：7萬／54.6萬  月：6.5萬（即月入4.6萬港元）

　　▶東歐／巴爾幹半島：4.5萬／35.1萬（即月入2.9萬港元）

　　▶非洲撒哈拉沙漠以南：4萬／32.2萬 （即月入2.6萬港元）

　　▶拉丁美洲／加勒比地區：3.5萬／27,3萬（即月入2.3萬港元）