《小傳日記》十九大前夕，魚缸靜蠅蠅；生發發回軟，悶市無力升！

　　香江魚缸噚日（１６日）傳出生發發（００３８８）建議削減股票印花稅，缸友們開心到不亦樂乎，齊齊湧去掃貨。不過午後ＣＥＯ李小加出嚟澄清，魚缸已經縮番唔少，之後連港府都話冇計劃咁做；無消息炒之下，今日（１７日）魚缸又回復平靜。
　　大市開市踢起８４點後就呆呆滯滯，全日高低波幅都只得１３５點，埋單好友贏個馬鼻，收漲４點報２８６９７；國指就收低３４點報１１５６８點。
　　魚缸高處不勝寒，加上聽日（１８日）就係「十九大」會議，缸友都等緊消息宣布；全日魚缸都靜返好多，成交只得８３９億銀。
　
＊政府不減稅好友心都碎，生發發急回後悔昨高追？！＊
　
　　ＱＱ（００７００）不愧有股王之稱，今朝一開市又破頂，高見３５６﹒４銀。公司噚晚宣布，現有股東持有１２５６股ＱＱ就有權認購一股閱文，即大約買１３手ＱＱ就有權認購一股閱文新股，真係認真夠「誠意」！相信唔少缸友都只能夠等閱文ＩＰＯ時先認購啦。另一方面，唔知係咪受到主席馬化騰減持嘅消息影響，ＱＱ最後跣低ＤＤ收３５４﹒８銀。小傳就認為，等
ＱＱ唞一唞，謀定而後著，又或者考慮吓其他落後嘅股份！
　　政府話無計劃檢示香江股票印花稅，生發發經過噚日大升之後，今日又腳軟返近２巴仙報
２２２銀。
　　中銀監指，同業理財餘額因為內地控制風險所致而按年有所減少，但招行（０３９６８）仍獲多間券商維持「掃貨」評級，彈高２巴仙報３０﹒５銀。盤中仲高見３１﹒３５銀破頂添！
　　傳聞出售中環中心嘅長實（０１１１３）獲摩通維持「增持」評級，而且公司上環新盤加推
，股價繼續跳起逾１巴仙，報６７﹒３５銀。
　
＊主席忽減持ＱＱ微微軟，中金錫旺旺街坊有點酸＊
　
　　旺旺（００１５１）今日嘅表現夠晒出位，皆因有中金唱好，不單止升「他履」由５﹒２５銀升到去７﹒３４銀，仲升評級至「買入」，帶動隻股衝前逾３巴仙，報６﹒１８銀。不過街坊康師傳（００３２２）就差Ｄ啦，被海通國際削「他屐」同降評級至「中性」，拖累跌低３巴仙
，報１２﹒０８銀。至於統一（００２２０）就跳起近２巴仙，報７﹒３３銀。
　　半導體佬方面，中芯國際（００９８１）都得到中金唱好，將「他履」由７﹒５銀升到９銀
，大摩仲維持１０﹒５銀添，收市就成功衝前近２巴仙，報１０﹒１４銀。點知原來街坊華虹半導彈（０１３４７）仲厲害，獲麥格理予１６銀目標價，股價急跳起近１３巴仙，報１２﹒１銀
。
　
＊大行來唱好半導體高高，國美有鑊氣中滔更風騷＊
　
　　個別魚毛走勢都好強，買中咗嘅缸友應該好開心啦！好似今日升幅榜中排第一嘅西王置業
（０２０８８），原來公司有可換股優先股所附帶嘅轉換權獲行使，公司發行達１﹒７億股，每股發行價１﹒１８銀，即較前收市價溢價３﹒７倍，是以公司股價飛起１﹒４倍收０﹒６銀，真係太犀利！現價仲係低過每股發行價添！
　　神州食品（００５０６）出售酒品業務，涉資逾５０億銀，公司仲擬派特息９３仙，都吸引資金入場，股價爆起近１４巴仙報５銀，成交都有逾３億銀。
　　國美（００４９３）靜咗咁耐，失驚無神，跑上近８巴仙，報０﹒９８銀，一度破１元關口添；中滔環保（０１３６３）就有大成交配合，３﹒７億銀炒起逾１４巴仙報１﹒２９銀，勁！
　
＊５０６爆升皆因派得爽，江銅發盈喜半新股勢壯＊
　
　　江西銅（００３５８）發盈喜，話預計頭三季嘅純利按年大增五成至七成，有貨缸友們緊係Ｈａｐｐｙ啦，最終衝前咗逾２巴仙，報１３﹒２６銀。
　　有幾隻半新股真係好勁。建築佬永勤集團（０８２７５），上市翌日飛起近３８巴仙，收報０﹒４９５銀，足足較招股價０﹒３４銀高近４６巴仙啊；家居用品設計佬舍圖（０８３９２）都唔弱，彈起近３７巴仙，報０﹒３３５銀，累計高過招股價５２巴仙；而同日掛牌嘅眾誠能源
（０２３３７）跳起近３巴仙，報３﹒１２銀；飛霓控股（０８４８０）就行前近５巴仙，報
０﹒６７銀。之不過，高萌科技（０８０６５）跌低２巴仙，報０﹒８５銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。