美股對全球影響力巨大，雖然香江魚缸依家好受神州孖屐嘅影響，但係都仲有一半機會受到美股嘅牽制，所以美股千萬唔好有咩事，如果唔係魚缸近日嘅升勢又會受到打擊，加上聽日（１９日）適逢係１９８７年股災３０周年，阿臣有Ｄ朋友擔心起來，怕今年會歷史重演。
＊八七股災原因眾說紛紜，此前累升龐大＊
雖然１９８７年阿臣仲未出世，但係阿臣後來認識到，當年都係由美股下跌而帶動全球股災
。話說１９８７年１０月１６日星期五，道指單日跌近５巴仙，恒指星期一（當年１０月１９日
）即急瀉１１巴仙。當晚，美股又無停止跌勢，進一步急挫約兩成二，第二日香江呢邊宣布停市四日，但１０月２６日復市暴跌三成三，認真慘烈。如果依定魚缸要跌三分一，阿臣心諗，可以真係要「上ＩＦＣ」啦！
導致嗰一次股災嘅原因眾說紛紜，因為當日無重大負面消息。有人更認為係香江魚缸帶動美股跌先正確，因為有人認為花旗國希望令美金升值嚟遏抑通脹，所以貨幣緊縮政策比歐洲推出得快，結果令孖屐對同美金掛勾嘅港元信心下降，令香江股市下挫。不幸地，盛行程式交易嘅美股
，繼續跟隨下跌，而且一跌不可收拾，再將呢一波下跌蔓延全球。
睇返數據，道指由１９８５年及１９８６年分別累漲近２８巴仙同近２３巴仙，１９８７年９月為止九個月再升近３７巴仙。至於港股，恒指於１９８５年漲４６巴仙，１９８６年升４７巴仙，１９８７年９月止九個月升５４巴仙。所以有人覺得，當年美股同香江魚缸大跌，只係一個正常嘅股市循環。
＊現今息口較當年低，港股不如往日瘋狂＊
回看返今日又如何呢？即管睇返過去兩年美股嘅走勢。２０１５年及２０１６年，道指分別累跌逾２巴仙同漲逾１３巴仙，而截至２０１７年９月底止九個月，道指再升逾１３巴仙，兩年多夾夾埋埋都只係累升咗近２６巴仙，都唔夠道指１９８５年單年嘅升幅。至於恒指走勢呢？
２０１５年跌約７巴仙，２０１６年微漲０﹒４巴仙，２０１７年９月止首三季升約２５巴仙。可以睇到，近幾年美股同香江魚缸嘅升勢，都無１９８７年咁犀利。
再睇睇息口，１９８６年花旗國有兩次加息期，分別係１９８６年５月２０日至７月１０日
，１９８６年１２月１６日至１９８７年１０月１８日。只有息口呢一點，近年嘅情形同
１９８６至１９８７年度有相似之處。依家就算同處加息周期，但環球息口都仲係偏低，比
１９８６年時期仲要低，因此全球正處於資金泛濫嘅階段，資產價格長遠相信都係有增無減。
再睇返恒生大中小型股指數，單計十月份，截至噚日為止，恒指大型股指數升近４巴仙，中型股指數升逾４巴仙，小型股指數升近３巴仙，資金已經唔單止集中喺大型股當中，有Ｄ資金已經分布至中型股之上，但小型股仲未跑得贏大、中型股。通常一個牛市嘅資金走向，都係先走入大型股，然後炒作落後中型股，再衝入小型股當中。如果小型股升幅仲大過大、中型股，咁後市先可以斷定就來見頂。基於現今情形，阿臣覺得個市仲未到尾聲，至於手上嘅貨，除咗騰訊
（００７００）阿臣唔會郁佢之外，其他股份再揸多一排先作睇吓如何調動。
表列截至１０月１８日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
越地 ２００００股 １﹒５４元 １﹒５２元 ３０４００元
民銀資本 ２００００股 ０﹒６４元 ０﹒６４元 １２８００元
騰訊 １００股 ３５０﹒００元 ３５２﹒６０元 ３５２６０元
中海物業 ５０００股 １﹒９５元 １﹒８４元 ９２００元
美股：
Ｔｅｓｌａ ２股 ３１６美元 ３５５﹒７５美元 ７１１﹒５０美元
＃（約５５５５港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８０７１計算
股票市值 ： ９３２１５元
剩餘現金 ： ３５８３元
組合淨值 ： ９６７９８元
組合本月收益表現：－ ２﹒２％（截至上月底止組合淨值：９８９９６元）
組合累計收益表現：＋２９﹒１％（本金７５０００元計）（２０１６年８月開倉）
＊數據截至今日１１：３０ａｍ
WoW WoW星期三：健康網購產品低至$99 (只限今天)► 立即行動
