《小傳日記》情人節放閃，小象人人愛！

　　今日（１４日）係情人節，不論網上，街上都充滿住「放閃」嘅幸福。當然，最幸福嘅就係花店老細喇。有報道話，今日想買２０枝玫瑰花，唔該承惠１６００蚊呀！浪漫嘅嘢，小傳就真係唔多識了。
　　都係講番魚缸戰況先，今日香江魚缸終於重拾番久違了嘅「牛氣」喇！自從踏入２月之後，魚缸跌到唔識停咁，加上港股通噚日（１３日）已經停咗，聽日（１５日）又係年三十晚半日市，Ａ場今日又收爐，缸友都唔敢抱咩寄望，諗住平平穩穩迎狗年好過。點知，今日好友嚟個大反擊，恒指高開１８４點後，就出力夾高股王ＱＱ（００７００）同埋中港兩地錢莊，大市一度爆升７９７點至３０６３７，差ＤＤ就收復番５０天線（約３０６５１）喇，埋單都有６７６點或逾２巴仙，收報３０５１５；國指收高２５６點或逾２巴仙，收報１２２６０。
　　雖然魚缸全日成交只得１１０６億銀左右，不過無北水掃貨下，都有呢個數，都相當唔錯了，讚！

＊高盛畀個讚小象急急彈，ＱＱ三連升反彈力好勁＊

　　大小象將會喺農曆新年假後，狗年魚缸第一日復市當天（２０日）派成績表，不過揭盅之前，高盛已經搶先行出嚟唱好小象，將目標價由１９０銀大升至２２０銀，評級由中性調高至買入，小象開心到做咗「小飛象」，一度飛高８巴仙至１９１﹒９銀，收市都仲報１９１﹒５銀添，超勁；媽媽大象（００００５），高盛預計佢又會宣布３０億美金回購，今日大象都開心踢高逾２巴仙報８１﹒９銀！街坊中銀香港（０２３８８）都跳起逾４巴仙收３９銀，原來佢又獲高盛升目標至４７﹒４銀，距離現價仲有大把水位！有貨缸友齊齊收情人節禮物喇！
　　股王ＱＱ上星期五（９日）失守４００銀大關後，已經逐步回復升勢，今日再行前近３巴仙收４３３﹒６銀，連續三日高收，重上番十天線（約４２７﹒１４銀）添。
　　仲有祖國錢莊都係大功臣，匯證唱好叫買四大內銀，建行（００９３９）表現最靚仔，大步抽高近５巴仙收８﹒１銀；街坊工行（０１３９８）都有近４巴仙進帳收６﹒７８銀，勁！

＊中海外高收中金叫加油，中移動憔悴粉絲心都碎＊

　　中海外（００６８８）就有中金呵護叫買，今日都發力升逾６巴仙收２８銀，係第二威藍戰。街坊潤地（０１１０９）都袋咗近４巴仙落袋，報２９﹒４５銀。
　　舜宇（０２３８２）噚日發盈喜後，升到嘭嘭聲，今日繼續獲瑞信唱好，維持１５６銀目標不變，帶動股價再向前行多逾４巴仙收１２４﹒３銀，又升遠離開１００天線喇！街坊瑞聲
（０２０１８）就陰公豬，喺１００天線水平度拉鋸，埋單要舉白旗收跌近１巴仙報１４８銀。
　　砵砵車股都有好消息，阿爺公布新能源車新版補貼政策，利好龍頭企業，大和發報告話，政策對比亞迪（０１２１１）有正面影響，重申「買入」，不過由於公司管理層將新能源車銷量增長指引調低，所以大和都將目標價由８５銀稍為降至８２銀。結果比亞迪收漲逾近４巴仙報
７１﹒３銀。其他街坊當中，華晨（０１１１４）就好醒神，衝前近５巴仙收２０﹒１５銀。
　　不過，中移動（００９４１）就一Ｄ都感受唔到情人節嘅喜悅，「九連陰」之下，全日都逆市而行，最低仲試過７２﹒８５銀創近兩年低位，慘，好彩埋單倒升番ＤＤ，收７３﹒７銀咋。

＊澳能最風騷匯聚見復甦，創板半新丁有貨面都青＊

　　噚日有三隻半新丁正式入缸，馬交建築工程承建商澳能建設（０１１８３）超購近１６１倍，雖然佢喺暗盤表現差咗Ｄ，跌咗近１３巴仙，但噚日第一日出場就升咗近一成，今日再續升勢，炒高咗近三成，報１﹒７８銀，高招股價１﹒２５銀超過４２巴仙。
　　定制電線組件供應商匯聚科技（０１７２９）首掛即潛水，跌咗一成半，但今日嚟個報復式反彈，升咗超過３４巴仙，報０﹒５７銀，比招股價０﹒５銀高出１４巴仙。
　　創板魚毛Ｔｏｐ　Ｓｔａｎｄａｒｄ（０８５１０）就冇乜運行，噚日首日入缸就跌咗近６巴仙，今朝跳彈床跳起咗近１１巴仙，高見０﹒３６５銀就有唔少缸友掟貨走人，埋單大插近兩成，報０﹒２６５銀，較招股價０﹒３５銀潛水超過２４巴仙。
　　由阿媽雅居樂（０３３８３）分拆出嚟嘅雅生活（０３３１９）喺上個禮拜五以介紹形成上市，雖然連升三日急升咗近２４巴仙，而今日就彈起近９巴仙，報１１﹒７２銀，但就較上市價１２﹒３銀潛水近半成。

＊新奧昨急漲缸友今惆悵，北汽發盈警股價唔好景＊

　　魚缸上個禮拜經歷完「大地震」後，唔少股份喺今個禮拜都開始喺低位彈返上嚟，神州燃氣佬新奧能源（０２６８８）快人一步喺上個禮拜三（７號）已經開始跳彈床，之後仲要連升三日升咗近１３巴仙。呢位燃氣佬今個星期表現唔算突出，但噚日就突然喺收市競價時段Ｍａｒｋ高，最後以全日最高位６７﹒３５銀收市，兼且係最新山頂位，爆升１２巴仙。唔好彩嘅係原來噚日強勁升勢只係曇花一現，即使大和最新唱好佢有防守性，同估值低過唔少街坊，仲畀咗個「掃貨」評級，但高處不勝寒，今朝一開市就插咗近半成，之後仲愈插愈深，最後埋單跣低超過７巴仙，報６２﹒４銀。
　　北京汽車（０１９５８）噚晚發盈警，預期舊年少賺六成半。不過，北汽同時亦都有好消息，旗下北京奔馳舊年多賺６２巴仙至２３﹒５億歐元。北汽今朝低開超過２巴仙，之後雖然一度急插近８巴仙，但愈跌愈少，最後全日埋單計，只係跣低１巴仙，報１０﹒９８銀。
　　本地薑券商佬民眾金融（００２７９）上個禮拜逆市升咗近２巴仙，過去兩日加埋仲要爆升咗超過２９巴仙，但今日走勢好反覆，最多升咗近１４巴仙，但又一度倒跌落去，最後收市又升番近１４巴仙，報２﹒０１銀，三日加埋升咗近４７巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。