《小傳日記》企鵝績後仍穩陣，魚缸悶市冇乜運！

　　重磅大佬ＱＱ（００７００）噚日（１５日）嘅強勁氣勢未能再刺激魚缸氣氛下，噚晚花旗國個邊就有貿易代表話，唔會諗住暫停新一輪對神州嘅關稅措施，加上歐洲個邊又「立立亂」，美金乘機彈返上嚟，香江魚缸今朝（１６日）低開６１點後就開始腳軟，到咗十點幾，仲一度唔見咗２５３點，全日低見２５８５０點，中午埋單就符碌最多倒升返９７點，高見２６１９７點。
　　下晝開市後，本地薑公用佬唔爭氣，生發發（００３８８）同其他濠賭股都一齊腳軟，魚缸大部分時間都係唔上唔落咁，最終全日悶市升咗８０點，報２６１８３點，仲守得住條十天線（２５９４０點）。全日成交都相當冷清，只有７８３億銀，較噚日少咗９巴仙。國貨都係冇乜料到，收報１０５８３點，升２８點。
　　Ａ場表現就唔差，埋單有１０點升幅落袋，報２６７９點。

＊中銀有追捧小象亦受寵，大象夠淡定中移亦好命＊

　　今日魚缸冇咩風浪，但個別本地薑錢莊就被缸友睇中，早排因為業績唔夠省鏡嘅中銀（０２３８８）就一直被缸友掟貨，喺今個星期二（１３日）仲創埋約１９個月新低，低見２８個半。不過，喺呢個低位就有唔少缸友入市撈底，跌勢亦都見喘定，今日仲炒高超過２巴仙，報３０﹒２銀，破埋條十天線（２９﹒６１銀）兼成為最勁藍戰士！小象（０００１１）喺８月尾由山頂位２１４﹒３銀碌返落嚟，同樣喺今個星期二低見１７５﹒３銀後開始彈返上嚟，今日升近１巴仙，報１８０﹒８銀。大象今日算係不過不失，報６６﹒２銀，升唔夠半巴仙。
　　ＱＱ雖然冇噚日咁強勢，但埋單都升咗近１巴仙，報２９０﹒４銀。ＡＩＡ（０１２９９）同中移動（００９４１）都一樣彈起近１巴仙，報６４﹒６銀同７６﹒８５銀。生發發（００３８８）就腳軟唔見咗近半巴仙，報２２８﹒４銀。建行（００９３９）同工行（０１３９８）齊齊跳起近半巴仙，報６﹒５３銀同５﹒４３銀。

＊阿爺再出手教育佬唞唞，５Ｇ股炒起缸友好歡喜＊

　　國務院禁止幼稚園過度逐利嘅行為，又限制上咗市嘅教育大佬們，唔可以通過股票「孖屐」融資，去Ｉｎｖｅｓｔ搵大錢嘅幼稚園，教育佬今朝全部仆低，楓葉教育（０１３１７）插近１９巴仙，報３﹒６１銀。２１世紀教育（０１５９８）曾見０﹒７５銀創上市新低，全日都要跟跌逾１２巴仙，報０﹒９４銀。天立教育（０１７７３）同睿見教育（０６０６８）挫約一成半，分別報１﹒５銀兼３﹒６２銀。中教控股（００８３９）仆低超過６巴仙，報１０﹒８銀。民生教育（０１５６９）跌半成，報１﹒４銀。
　　中興（００７６３）之前就確認，已經完成５Ｇ網絡嘅通話、網頁瀏覽，同埋微信服務嘅Ｃｏｎｎｅｃｔｉｏｎ測試，兼且確認下年上半年會推出旗下第一款５Ｇ網絡手機，今日有關大佬們好Ｃｈａｒｍｉｎｇ，中通服務（００５５２）好叻，走高逾７巴仙，報６﹒９銀。中興通揚逾６巴仙，報１６﹒３銀。摩比發展（００９４７）最Ｍａｎ，全日最高見０﹒８７銀，埋單走高近１１巴仙，報０﹒９１銀。長飛光纖（０６８６９）就跟升半成，報２２蚊。

＊富智康配股走勢無得估，中芯遭降價股價無丟架＊

　　富智康（０２０３８）噚日就話向非公司關聯人士配發１﹒２１億股，佔已發行股本超過１巴仙，兼且較噚日收市價大折讓超過５９巴仙配售，但奇怪嘅係今日股價竟然向上走，升近１０巴仙，報０﹒９銀。同系街坊鴻騰精密（０６０８８）就腳軟唔見咗一格報３﹒６３銀。瑞聲（０２０１８）股價係５０蚊左右略見反彈，今日收市升逾１巴仙，報５３﹒５銀。比亞迪電子（００２８５）升逾４巴仙，報１１﹒２４銀。
　　中芯（００９８１）早幾日公布業績勝預期，但大摩反而唱淡，將佢「他屐」由７個半降至５﹒８銀，但股價表現反而衝上去，今日收市升逾２巴仙，報６﹒８６銀。華虹半導體（０１３４７）早幾日因為多間大行削價而眼濕濕，今日再跌近２巴仙，報１５﹒４８銀。ＡＳＭ太平洋（００５２２）升亳半子收７４﹒０５銀。

＊比亞迪真強又見七連陽，廣匯寶信勁正通汽車醒＊

　　比亞迪（０１２１１）最近好似生猛返晒咁，早幾日大摩先唱好佢，將目標價升至５０蚊，比亞迪股價更加見七連陽，收市升２巴仙，報５５元。其他砵砵車都略有追捧，北汽（０１９５８）升逾３巴仙，報４﹒５銀。華晨（０１１１４）升近４巴仙，報６﹒７８銀。長汽（０２３３３）升逾半個巴仙，報４﹒８２銀。廣汽（０２２３８）升一格報８﹒１２銀。吉利（００１７５）無升跌，報１４﹒７８銀。
　　廣匯寶信（０１２９３）係月初時候被大摩話未來１５日股價將會跑輸街坊，但鬼馬嘅地方係佢已經連升五日堅見五連陽，所以有時真係信自己好過信大行啦！今日升近１２巴仙，報２﹒１５銀。另外，正通汽車（０１７２８）近期就威水啦，旗下附屬東正汽車金融被批准發Ｈ股，刺激埋正通連升三日，今日漲逾１巴仙，報４﹒０６銀。周末愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。