魚缸噚日（１４日）突破條牛熊分界線，仲以「牛市」來臨，點知魚缸今日（１５日）借勢回調大插水，恒指朝早已經低開１９０點，即時穿咗牛熊線（目前係２８３６８點），之後神州公布ＣＰＩ同ＰＰＩ差過預期都算，仲要創超過一年低位，喺淡友發功之下，愈跌愈急，二萬八都失守，當中砵砵車帶頭落斜，藥業佬能醫不自醫而枕住畀人狂質，手機設備大佬亦都繼續畀人掟貨，只有啲豬肉股跟住Ａ場相關股而踩行油，一眾黃金佬亦都因為淡友撐實開心到跳起。另外，阿爺話要支持民間啲公司籌錢，神州錢莊亦當然喊晒口頭耷耷。
恒指全日收報２７９００點，跌５３１點，跌幅近２巴仙，亦穿埋十天線（２８０５９點），全日成交近１０２３億銀減少近１個半巴仙。國貨收報１０９３７點，跌２３２點，跌咗逾２巴仙。
Ａ場個邊都玩插水，上證收報２６８２點跌３７點，深證收報８１２５點跌９４點，跌幅都係逾１巴仙。
睇睇大隻藍戰士，大象（００００５）畀大摩降「他屐」，全日跌逾１巴仙，報６６﹒３５銀。生發發（００３８８）畀野村睇好做首選，市跌黠會唔回吐呢，最終跌近３巴仙，報２５１銀。ＱＱ（００７００）公布咗遊戲直播有咩唔畀做嘅指標，全日插逾２巴仙，收報３３３﹒８銀；而在魚缸打烊後內地公布第六批遊戲版號，ＱＱ又再無份，唔知下周一（１８日）缸友有咩反應。ＡＩＡ（０１２９９）畀野村調高增長預測，全日都回吐逾２巴仙，報７３﹒２銀。
＊汽車銷量減車股前景淡，５Ｇ佬腳震投資趨審慎＊
神州個上汽集團１月份汽車銷量跌咗逾１４巴仙，加上有報道話，神州同花旗國講數提議取消汽車採購補貼，消息令砵砵車股受壓。被大摩唱淡嘅吉利（００７８８）全日跣低逾５巴仙，報１４銀。華晨（０１１１４）亦軟５巴仙，報７﹒５９銀。比亞迪（０１２１１）插水逾３巴仙，報５０﹒３５銀。廣汽（０２２３８）就瀉咗逾４巴仙，報９﹒２５銀。
摩通維持濰柴動力（０２３３８）嘅「他屐」喺９﹒６銀同中性評級，最終跌逾５巴仙，報１０﹒３８銀。其他重機佬都受壓，中聯重科（０１１５７）吐近１巴仙，報３﹒３５銀。中國龍工（０３３３９）就跌近３巴仙，報２﹒５４銀。
５Ｇ佬升咗好幾日之後終於見回吐。高盛話今年係投資中國５Ｇ嘅好時機，不過因為個ＣＯＳＴ例如鐵塔嘅租賃費、銷售都幾貴，估「食水」有限，不過預期中移動（００９４１）係最受惠嘅電訊佬，佢今日就微跌唔夠半巴仙，報８３﹒３銀。而鐵塔（００７８８）同中興（００７６３）都會率先有ＳＯ，不過今日就分別跌約１巴仙，分別報１﹒７７銀同１８﹒０８銀。同板塊其他５Ｇ佬都縮水得好慘，中電信（００７２８）瀉逾３巴仙，報４﹒３２銀，聯通（００７６２）就跌逾２巴仙，報９﹒１７銀。
＊高佬縱唱好美高梅變草，內險全碌低眾安無走雞＊
賭佬今日無哂氣勢，評級佬高盛話美高梅（０２２８２）上年第四季ＥＢＩＴＤＡ按季走高２７巴仙，叻過「孖屐」預期，主要因為成本控制，同埋ＶＩＰ錄得３﹒３巴仙淨贏率，較預期高所致，所以畀咗「他屐」１６﹒６銀過佢，不過可憐豬都要跌６巴仙，報１４﹒５８銀。銀娛（０００２７）仆低近半成，報５１﹒７銀。新濠國際（００２００）跟跌半成，報１６﹒６２銀。澳博（００８８０）走低近４巴仙，報８﹒０６銀。永利馬交（０１１２８）跌７巴仙，報１７﹒８８銀。
內險佬今日都要碌低，眾安在綫（０６０６０）１月保險保費收入錄得約９﹒１５億銀人仔，按年走高２９﹒６巴仙，不過都要仆低近半成，報２７﹒１５銀。太平（００９６６）同跌半成，報２１﹒７銀。新華保險（０１３３６）及財險（０２３２８）都無運行，均走低４巴仙，分別報３３﹒７銀及８﹒３１銀。
＊豬肉價連升中糧肉食醒，體育用品股價跌無得估＊
神州豬價連升三日，外三元豬價達每公斤１４﹒９銀人仔，Ａ場豬肉股都立即跟漲，港股呢邊嘅豬肉概念都唔執輸！惠生國際（０１３４０）急升逾三成，報０﹒１７９銀，成為升幅最大魚毛；中糧肉食（０１６１０）亦有表現最好，漲逾一成四，收報２﹒０９銀；萬洲（００２８８）逆市抽高逾１巴仙，收報７﹒３９銀，係表現最好藍戰士；雨潤食品（０１０６８）升逾３巴仙，報１﹒６５銀；大成食品（０３９９９）跟逾７巴仙，收報０﹒４４銀。
今日堆體育用品全面回吐，其中３６１度（０１３６１）發盈警，拖累股急瀉逾一成二，收報１﹒５３銀。安踏體育（０２０２０）今日都軟逾４巴仙，收報４１﹒９５銀。李寧（０２３３１）插逾２巴仙，收報１０銀。迅銷（０６２８８）今日跪低逾１巴仙，收報３４﹒１銀。周末愉快！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇
37,917.95
