《小傳日記》港所大刁恐撻Ｑ，二萬七關險觸礁！

　　花旗國一哥侵侵（特朗普）今日（１２日）突然發推文，話畀面鶴叔（劉鶴）同神州７０周年國慶，原本喺１０月１日向神州２５００億美金進口商品加徵多半成關稅，即係稅率由兩成半調高至三成，延期至１０月１５日先至實行，貿易戰緊張狀態進一步緩和。而較早前，神州宣布對１６種花旗國商品豁免加徵關稅，顯示出解決貿易戰嘅誠意，花旗國魚缸隔晚表現強勁，標指仲企穩三千點埋單。侵侵延徵關稅，禮尚往來，釋出善意。
　　不過，香江魚缸呢邊就冇咩料到，今朝以全日最高位開２７２８３點，升１２４點，隨住生發發（００３８８）提出同倫交所收購合併嘅出價實在太高，「孖屐」都唔係太睇好呢單「大刁」，生發發最多蒸發近４巴仙；加上中港銀行同磚頭噚日升完後冇晒力，魚缸最多唔見咗１９１點兼失守埋二萬七同５０天線（２６９９８點），低見２６９６７點。
　　然而，今日ＱＱ（００７００）表現生性缸友倍感高興，而一啲出口工業股同內需股都有資金追捧下，魚缸好好快又收復返二萬七同５０天線，最終全日埋單只係蒸發咗７１點或唔夠半巴仙，報２７０８７點。主板成交７６８億銀減少逾一成四。國貨佬指數彈起２７點或唔夠半巴仙，報１０５９２點。
　　Ａ場今日表現都算生猛，滬指跳起２２點或近１巴仙，報３０３１點。深成指升６６點或超過半巴仙，報９９１９點。
　　生發發被花旗狠削超過兩成六「他屐」至２１０蚊，評級一下子降至「掟貨」，缸友仲唔走夾唔唞咩，佢全日勁插超過３巴仙，報２３７﹒４銀，係全日表現最差嘅藍戰士！ＱＱ跳起近１巴仙，報３４９﹒４銀。ＡＩＡ（０１２９９）跣低超過１巴仙，報７９﹒２銀。大象（００００５）冇咗近１巴仙，報６０﹒２５銀。Ａ場表現架勢，平保（０２３１８）係所有重磅大佬入面最勁揪，勁彈逾１巴仙，報９４﹒６５銀。

＊郭台銘割席富智康有力，５Ｇ急起步熊貓升勢冒＊

　　蘋果公司喺今個星期三（１１日）發布嘅新「唉瘋」都算叫做有Ｄ驚喜，而「孖屐」反應都唔錯，蘋果噚日喺花旗國魚缸埋單都跳起超過３巴仙，市值重上萬億美金，勁！今日一眾手機設備佬都借勢炒起，跟蘋果搵食嘅瑞聲（０２０１８）彈起近３巴仙，報４０﹒６５銀。其他街坊雖然冇咩蘋果生意做，但都受缸友祝福，丘鈦（０１４７８）勁彈超過半成，報９﹒２３銀。比亞迪電子（００２８５）升咗４巴仙，報１１﹒９２銀。舜宇（０２３８２）只係漲１巴仙，報１１６﹒４銀。鴻海集團創辦人郭台銘今日同國民黨割席，但就未知會唔會出嚟選寶島總統，缸友仍然偷步炒高個別鴻海系股份，富智康（０２０３８）爆升近一成半，報１﹒１８銀，但鴻騰精密（０６０８８）就唔見咗近半巴仙，報３﹒５３銀。
　　深圳今日話要喺出年八月前，實現全市５Ｇ網絡覆蓋，５Ｇ概念股今日全線炒高，熊貓電子（００５５３）彈起近６巴仙，報３﹒４４銀。中興通訊（００７６３）跳起逾２巴仙，報２３﹒１銀。京信通信（０２３４２）升咗近３巴仙，報１﹒９２銀。長飛光纖（０６８６９）同神州鐵塔（００７８８）進帳超過１巴仙，報１﹒８５銀同１４﹒４８銀。
　　三大神州電訊佬就冇咩聲氣，神州移動（００９４１）同聯通（００７６２）只係跳起一格，報６７﹒３５銀同８﹒４７銀。神州電信（００７２８）冇升跌，報３﹒７２銀。

＊侵侵延死期出口升唔停，阿爺１２招豬價向上飆＊

　　侵侵突然變神士咁，又再押後加徵關稅日期，一眾貿易戰嘅「風眼股」仲唔齊齊開心跳起咩！當中出口佬差唔多都起飛起哂，創科實業（００６６９）踢高近４巴仙，報５７﹒３銀，係表現最好嘅藍戰士！敏實（００４２５）跳起逾３巴仙，報２６﹒７銀。申洲（０２３１３）彈近１巴仙，報１０９﹒２銀。福耀玻璃（０３６０６）鏟起近２巴仙，報２３﹒３５元。不過，敏華（０１９９９）就軟腳不足半巴仙，報４﹒４４銀。
　　另外，豬肉佬除咗受貿易戰緩和之外，湖南省政府辦公廳噚日都出咗１２條具體措施，去促進生豬產業高質量發展，保障「孖屐」供應同價格基本穩定。萬洲（００２８８）踢高近４巴仙，報７﹒２２銀。雨潤食品（０１０６８）起飛逾３巴仙，報０﹒９７銀。中糧肉食（０１６１０）跳起逾３巴仙，報２﹒３７銀。不過，接近收市前，普甜食品（０１６９９）唔見近４巴仙，報０﹒２１７銀。

＊燃氣表現靚新奧靚爆鏡，光伏有力捧協鑫系受寵＊

　　噚日交銀國際話，因為對天然氣銷售同售氣毛差預測保持謹慎，所以覆蓋燃氣佬上半年成績表都稍微超出「他屐」，所以神州燃氣佬今日繼續好生性踢高。野村維持新奧（０２６８８）「他屐」１０３銀同「掃貨」評級，新奧能源鏟高近３巴仙，報７９﹒７銀，係今日表現最好國貨佬。中國燃氣（００３８４）踢高近３巴仙，報２９﹒９銀。華潤燃氣（０１１９３）高逾半巴仙，報３７﹒６５銀。北京控股（００３９２）進帳１毫子，報３８﹒５銀。
　　光伏佬喺魚缸埋單之前畀缸友撐實，協鑫系兄弟更加踩行油。保利協鑫（０３８００）飆升逾１４巴仙，報０﹒３６５銀。佢兄弟協鑫新能源（００４５１）鏟高逾７巴仙，報０﹒２９５銀。信義能源（０３８６８）踢高逾３巴仙，報２﹒１４銀。佢兄弟信義光能（００９６８）多近２巴仙，報４﹒９４銀。福萊特玻璃（０６８６５）走高逾４巴仙，報４﹒４４銀。陽光能源（００７５７）高近２巴仙，報０﹒１０７銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。