七一轉眼又至，近期政商界人士陸陸續續趁「回歸廿年」現身大發偉論。好似前特首「老董」就話，人心回歸需要一個過程，香港好多年輕人都係喺殖民地時代長大，未來要搞好國民教育、歷史教育，令年青一代變得愛國。
古臣呢個９０後聽完得啖笑，依家立場最激進嘅年齡層係１８至２９歲，佢哋喺回歸前出世，但讀中小學之時米字旗早已降下，受嘅都係五星旗下嘅教育，如果係因為教育失敗而導致新一代不愛國，唔知邊個要負責呢？想當年又係邊個政府朝令夕改，推出「３３４」令教育制度愈趨重商輕文，令修讀中史嘅學生日漸減少？
或者亦因為前三屆政府嘅教育政策太失敗，令未來特首林鄭月娥太失望，嚟緊佢打算直接由幼稚園開始灌輸「我是中國人」，至於接受過回歸早期教育嘅年輕人惟有全數放棄了。
＊缺乏創新，食足廿年老本＊
相對於人心未回歸，香港嘅經濟早就回歸得徹徹底底，有報道話９７年港股只有３９家Ｈ股
，佔總市值１﹒５％，去到舊年年底上市嘅中資企業經已上千間，市值佔比遞增至６３％。阿臣就認為，港股「染紅」雖無奈但亦無可厚非，始終內地經濟起飛，香港作為金融中心無法唔跟大趨勢、背靠祖國搵食。
不過，另一現象卻令人擔憂，廿年來內地有騰訊（００７００）、阿里巴巴冒起，香港卻毫無新面孔，來來去去只有長和系、恒地（０００１２）、新地（０００１６）等地產商，背後反映咗地產霸權，還是香港缺乏創新環境，實在值得社會深思。
本周古臣組合按兵不動，迎接２０１７年下半年的來臨。
表列截至６月２８日止投資組合表現：
－－－－－－－－－－－－－－－－－－－－－－－－－－－－－－－－－－－－－－－－
股票倉
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
長和 ５００股 ９９﹒６元 ９８﹒９元 ４９４５０元
－－－－－－－－－－－－－－－－－－－－－－－－－－－－－－－－－－－－－－－－
期權倉
股份 種類 張數 行使價 到期日 買入價 總成本 盈虧
－－－－－－－－－－－－－－－－－－－－－－－－－－－－－－－－－－－－－－－－
潤地 認沽期權 １０張 ２１元 即月 ０﹒１元 ２０００元 －２０００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４９４５０元
期權市值 ： ０元
剩餘現金 ：２６９８０元
組合淨值 ：７６４３０元
組合本周收益表現：－ １﹒２％
組合本月收益表現：－ ４﹒２％（截至上月底止組合淨值：７９７８０元）
組合累計收益表現：＋１７﹒６％（本金６５０００元）（２０１６年８月開倉）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
