２０１６年世界各地處處眼鏡碎，英國６月意外脫歐、哥倫比亞和平協議１０月被公投否決、美國上星期爆冷選埋「狂人」特朗普做總統。古臣完全睇唔透，英美兩國就話係對精英主義嘅反撲啫，哥倫比亞係連可以結束５２年內戰嘅機會都放棄埋喎。嚟緊１２月有意大利憲法公投，法國、德國就出年大選，「黑天鵝」會唔會一波接一波散落全球，就要拭目以待啦！
其實，邊個話香港人唔關心政治，個個望實美國大選仿如評論家上身，話特朗普入主白宮會點樣帶嚟不穩定，小至怕日圓升去旅行會買貴貨，大至驚影響中美貿易，而股市嘅反應一樣咁大，點票日可以跟住票數急瀉９００幾點。至於香港自己事呢？咩立法會選舉、釋法緊係冇影響啦，大家咪齊齊「股照炒、舞照跳」。
＊特朗普上台科網冇運行？＊
阿臣上回已經提過騰訊（００７００）跌不停，望住依幾日一度連１９０元大關都失守埋，真係揼哂心口都冇用。姨媽姑姐輪住話不如止蝕離場啦，依家特朗普上台刺激金融業，科網股吸引力大減好難炒翻起，遲吓跌深啲只會更肉赤。阿臣唔係冇考慮過，始終本金得丁碎咁多，一隻ＱＱ砸死哂啲錢冇得轉場博翻身，坐艇又唔知要坐幾耐，之但係內心總有不甘，決定睇埋ＱＱ今日放榜表現點先算。
睇新聞綜合證券行分析，估計騰訊第三季調整後淨利１１６﹒８億人仔，按年大升５４％。ＱＱ話哂首季、中期業績都比市場預期好，阿臣就包拗頸賭佢今次成績都唔會曳得去邊！冇理由因為小小挫折就咁快質疑自己嘅眼光架嘛！
表列截至１１月１６日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
騰訊 １００股 ２０３﹒４０元 １９８﹒００元 １９８００元
電能 ５００股 ７１﹒９０元 ７２﹒４５元 ３６２２５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５６０２５元
剩餘現金 ： ８５７５元
組合淨值 ：６４６００元（本月曾注資５０００元）
組合本周收益表現：－０﹒９６％
組合本月收益表現：－１﹒５７％（截至１０月底止組合淨值：６０６３０元）
組合累計收益表現：－０﹒６２％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
