相信唔少朋友同阿臣一樣都好關心ＱＱ（００７００）嘅發展，佢上禮拜公布第三季純利升４３％，但成績算唔算好實在眾說紛紜，幾份報章、幾間投行由「勝預期」、「符預期」到「遜預期」都寫過哂，真係信ｒｅｐｏｒｔｓ不如信自己。
其實，古臣一直睇好ＱＱ嘅原因之一，係覺得科網股貴為中國大媽至愛，Ａ股同類嘅市盈率閒閒地上百倍，而ＱＱ先得嗰５５倍，只要「深港通」一開應該唔愁水源。之但係，深港通卻一拖再拖唔見影，有傳係因為人仔貶值貶不停嚇親阿爺，擔心再多一個渠道，走資會一發不可收拾。
話雖阿爺最重面子、牙齒當金使，講得今年會通車就實冇走雞。不過，深港通大大話話講咗成年，同「狼來了」嘅故事一樣，股民由「憧憬」變「聽到厭」，已經開始唔多畀反應，ＱＱ唔少支持者失去耐性，自然亦一去冇回頭。
＊ＱＱ放榜後股價勢色唔對＊
學股壇前輩話齋，炒股最緊要係「勢」！阿臣見放榜後股價勢色唔多對，第二日（１７日）就忍唔住喺１９５﹒４銀放咗ＱＱ，未計手續費都蝕咗８００蚊，不過有返啲ｃａｓｈ喺手唔愁冇機會翻身吖！
至於電能（００００６）就冇咩大長進，反而大佬長和（００００１）上星期連續兩日回購股份，係舊年世紀重組後首次。人人話有誠哥睇好差極有個譜，古臣當然寄望除咗「李氏力場」之外，誠哥可以再發揮呼風喚雨嘅能力，帶旺吓同系嘅電能啦！
表列截至１１月２３日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
電能 ５００股 ７１﹒９０元 ７３﹒６０元 ３６８００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：３６８００元
剩餘現金 ：２８０３８元（連同賣出騰訊扣除手續費後１９４６３元）
組合淨值 ：６４８３８元（本月曾注資５０００元）
組合本周收益表現：＋０﹒３７％
組合本月收益表現：－１﹒２１％（截至１０月底止組合淨值：６０６３０元）
組合累計收益表現：－０﹒２５％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
