正當唔少香港人依個幾星期日日大排長龍買１０蚊優惠餐，麥當勞都正式染紅
，由中信股份（００２６７）同凱雷投資嘅財團，以１６１億收購中港業務同未來廿年特許經營權。傳中信集團之後再買埋首農逾１０％股權，話會同依家中資家禽商合作搞Ｍ記。
有朋友勸阿臣食埋今次好喇，食得多垃圾食物變「月巴族」事小，嚟多單福喜就事大！原因
？你懂的！
阿臣都不禁慨嘆，好多嘢我哋想避都避唔到，假米假蛋成日聽、霧霾又吹到落嚟，就連故宮博物館都可以霸王硬上弓，禮崩樂壞嘅速度快到嚇死你。
退休保障諮詢完有九成人支持「不論貧富」方案，政府都可以話應該「重質不重量」啦，就算肯就博物館搞諮詢咪又係意見照聽行動照舊嘅「大龍鳳」。最好笑更莫過於一班「保王」人士嘅言論，「保密係想畀個驚喜大家」、「可以加入《鹿鼎記》元素、推出滿漢全席」，難道旅客可以試演韋小寶娶７個老婆，一或試食猴子腦、熊掌？「有國寶級文物送畀你，唔通唔要？」，咦，依句咁似兩年幾前嘅口號嘅，袋住先啦！
＊億仕登巨額超購，好夢一場空＊
原本古臣食過翻尋味，諗住再抽億仕登（０１６５６），點知ＩＰＯ驚人地超額認購
１８９１倍，要認購５００手先穩中一手，結果好夢又成空。再望望最近幾隻新股仔，醫療嘅冇興趣，一賺幾倍嘅創板更加冇我份，加上個市升到接近二萬三，睇怕之後會回一回，阿臣惟有按兵不動。不過，電能（００００６）、中交建（０１８００）就快返家鄉，總算係好消息。
表列截至１月１１日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
電能 ５００股 ７１﹒９０元 ７０﹒４５元 ３５２２５元
中交建 １０００股 ９﹒２５元 ９﹒１７元 ９１７０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４４３９５元
剩餘現金 ：１９６４９元
組合淨值 ：６４０４４元
組合本周收益表現：＋１﹒７％
組合本月收益表現：＋３﹒６％（截至去年底止組合淨值：６１８４３元）
組合累計收益表現：－１﹒５％（本金６５０００元）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
