話晒都係新春過後第一次同缸友見面，所以請容許古臣喺正月十二同大家拜個遲年，祝大家身體健康，打工仔加人工，香江今年最緊要有個好特首，等大家豐衣足食，薯片任食，磚頭任買。
＊傳阿爺一錘定音，特首選舉無份＊
薯片叔叔今個星期一（６日）公布政綱，當日傍晚就有消息傳出全國人大委員長張德江南下深圳「一錘定音」，指阿爺一致決定支持奶媽林鄭月娥。中華總商會會長蔡冠深又唔否認同中央官員會面，１８張選委票將綑綁提名奶媽。古臣望住薯片叔叔個籌款網站，就算一日籌得好多錢都無咩用，因為籌到錢係一回事，但攞唔攞到選委嘅票又係另一回事。得到市民支持，但得唔到選委支持，就無資格做特首囉。選特首呢家嘢，從來只係近１２００名嘅選委有得玩，古臣成年咗咁耐，都係得個望字，這些機會同女朋友一樣，「原來沒有，從來都沒有」！
＊新股配售上市，一樣會有小圈子＊
小圈子唔單止係政治上嘅現象，同朋友傾開先知喺股壇原來都係普遍現象。有日夜晚，古臣同讀Ｌａｗ嘅師兄喺諾士佛臺度閒聊，呢位師兄將法律知識應用到股票之上，幾年來賺咗唔少，古臣都努力向佢請教。酒酣之際大家講到小圈子呢個話題，師兄話原來創業板配售上市都成日係咁。雖然上市規則規定配售上市至少要有１００個公眾人士持有股票先可以掛牌，但師兄話呢
１００人其實都可以係自己人，而唔少用配售方式上市嘅創業板新股，首日掛牌都可以升幾倍，得到配售股份嘅呢１００個「公眾人士」就發啦！
＊唔敢輕舉妄動，留住現金睇定先＊
不過，由於呢種炒法太「狼」，結果惹嚟證監會關注。原定於星期一掛牌嘅賣ｂｒａ零售商芭迪具伊（０８２９７），上星期五（３日）就突然話延遲上市，原因係因為畀證監就股權集中嘅條例問話，有人就猜測，可能證監正正就係擔心公司會有「圍飛」情形出現，所以先盤問一番。而另一隻創業板新股尚捷（０８１８３），亦都因為同一原因延後配售上市。
上年古臣喺新股度賺少少錢，有時喺一隻新股度賺到十幾個巴仙都偷笑，唔敢想像賺幾倍又係點嘅玩法。Ｓａｄ啲講句，配售上市呢種小圈子，又係從來都沒有古臣份。不過，小富從儉大富由天，港股暫時又未見有咩利好消息可以大幅推高，所以暫時都唔敢輕舉妄動住，留住現金等待合適嘅時機。情人節就嚟到，都係飲返杯Ｄｒｙ Ｍａｒｔｉｎｉ，然後好好在家溫下ＣＦＡ算啦。
表列截至２月８日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
中交建 １０００股 ９﹒２５元 ９﹒４５元 ９４５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９４５０元
剩餘現金 ：５６００９元
組合淨值 ：６５４５９元
組合本周收益表現：＋０﹒１％
組合本月收益表現：＋０﹒１％（截至上月底止組合淨值：６５４１９元）
組合累計收益表現：＋０﹒７％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
