噚日（１４日）係情人佳節，有人扮成Ｉｒｏｎｍａｎ送花冧女，有人乘機打溫情牌，氹老婆之餘不忘一國兩制。古臣呢？呢一日唔去街，亦唔敢亂上ｆａｃｅｂｏｏｋ（怕心灰意冷），放工後只在家中默默睇年報發掘潛力股。
＊不要說好的一國兩制，只求和你一生一世＊
兩位特首參選人就醒目，把握情人節ｆｂ出文搞下公關，不過呢對參選人兩篇「愛的宣言」
，卻畀人截然不同嘅感覺。奶媽林鄭上載老公嘅剖白情書，附送埋一張「頭貼頭」嘅親密照，再加上佢老公一句「希望你可以成功當選……為落實一國兩制作出貢獻」。哇！連阿爺都出埋，唔知奶媽聽到咁嘅愛的宣言，會唔會覺得大壓力呢？
另一邊廂，薯片叔叔就寫咗一封給「香江的情書」，文章仲ｔａｇ咗「今天我們不談一國兩制只談一生一世」。薯片愛香江，只同香江人講一生一世，其他野都唔及呢樣重要，真係夠晒
ｒｏｍａｔｉｃ。查實一國兩制都無人話可以一生一世不變，基本法入面提到「五十年不變」之嘛，薯片叔叔大概睇得透呢點，所以先喺浪漫嘅節日拋開一國兩制唔理住。
＊持股一生一世談何容易？小小超沽香港電訊＊
古臣以前拍拖，都無同女朋友講一生一世，點解？古臣唔敢擔保日後嘅事，況且一生一世嘅事，唔係講就得，做到更加重要。而呢樣，亦都符合古臣嘅投資原則。君不見小小超嘅電盈
（００００８），都睇位大手減持香港電訊（０６８２３）咩？世上能夠持股一生一世嘅，除咗股神巴菲特都無出奇右。
已故曹ｓｉｒ話：「有智慧不如趁勢」。上星期古臣好彩趕得切上車，喺上星期三（８日）下午，畀古臣見到隻金隅（０２００９）突然好多買盤，同時水泥佬嘅大阿哥海螺水泥
（００９１４）亦都升唔少，所以古臣就惟有跟買金隅囉。古臣喺十天線左右直入，每股成本
３﹒０２銀，買咗１萬股。你問古臣點解唔買龍頭海螺？因為海螺升咗唔少，而金隅股價相對較落後，加上金隅同樣發過盈喜，又有國企重組概念，值博率高好多。如果之後可以喺３﹒２５銀左右企穩嘅，古臣就會繼續持有啊！
既然中資股呢浪咁犀利，古臣把握機會，將原本持有嘅中交建（０１８００）再加碼，古臣上周四（９日）喺９﹒８銀度買多咗一手，不過如果古臣大膽啲，就可以早啲做決定用更低嘅價買啦！
表列截至２月１５日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
中交建 １０００股 ９﹒２５元 １０﹒５６元 １０５６０元
１０００股 ９﹒８０元 １０﹒５６元 １０５６０元
金隅 １００００股 ３﹒０２元 ３﹒３２元 ３３２００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５４３２０元
剩餘現金 ：１５８５４元
組合淨值 ：７０１７４元
組合本周收益表現：＋７﹒２％
組合本月收益表現：＋７﹒３％（截至上月底止組合淨值：６５４１９元）
組合累計收益表現：＋８﹒０％（本金６５０００元）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
