影壇盛事奧斯卡頒獎典禮喺香港時間星期一（２７日）舉行，得獎名單出爐，２８歲嘅愛瑪史東（Ｅｍｍａ Ｓｔｏｎｅ）憑佢喺《星聲夢裡人》嘅表現而得到最佳女主角嘅殊榮。至於最佳電影，就由《月亮喜歡藍》獲得。
＊夢想，不過是磚頭＊
《星聲夢裡人》打動人嘅地方，係電影道出咗夢想同現實嘅對立，似乎係現代最令人唏噓嘅事情。男主角最終極嘅夢想係開設屬於自己嘅爵士酒吧，但迫於現實又要幫人彈住琴打住份工先。雖然份工令男主角遇上女主角，不過二人最終又因為現實問題未能妥協，而要同對方分手，成為錯過彼此嘅一對。或者你會覺得，要成全夢想就要同女朋友分手，想女朋友喺身邊就要向現實低頭，咁樣實在太誇張。不過，睇吓今日嘅香江，又的確有女仔會同你講：「無樓請唔好白撞。」既似荒謬，但又十分現實。不知不覺，擁有磚頭與否，已經變成衡量成功與否嘅標準。夢想值幾多錢？倒不如磚頭來得實際，因為起碼值幾百萬。３月份就有新居屋申請啦，各位打工一族又準備你哋嘅尋「夢」之旅未？
＊放棄中交建，換入大象＊
識時務者為俊傑，上星期有隻駿傑（０８１８８）配售上市第一日掛牌就被叫停牌，孖屐都估係同股份當日升５﹒４倍有關。古臣之前同大家討論過證監開始關注配售上市首日大升嘅股，駿傑喺咁嘅時勢仲夠膽咁炒作，有點兒「不識時務」，難怪大家都會認為證監今次十分嬲嬲豬。今日新聞話有４隻創仔，包括永順（０８４２１）、潪澔（０８４２３）、興銘
（０８４２５）、樺欣（０８４４２）就全部作公開發售。呢啲咁「識做」嘅公司，相信證監都會放過佢地一馬掛。無論如何，事件再一次令古臣覺得讀下上市規則，比起明白更多書本上嘅理論更加重要，睇嚟古臣都要向呢方面進修一下啦。
本周策略方面，誠如古臣上一期所講，如果中交建（０１８００）破唔到１０﹒７６銀，古臣就只好換馬，所以古臣就喺１０蚊嘅時候沽咗中交建，再將筆錢轉入大象（００００５）。大象上一次回購後，股價由５０蚊樓下炒返上６５蚊，最近大象公布咗第二次回購之後，已經開始回購咗好幾日，古臣因此今次決定把握大象回軟嘅機會，喺五十天線（６３﹒２４元）附近上車，繼續向夢想努力！
表列截至３月１日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
金隅 １００００股 ３﹒０２元 ３﹒６３元 ３６０００元
匯控 ４００股 ６３﹒００元 ６３﹒００元 ２５２００元
－－－－－－－－－－－－－－－－－－－－－－－－－－－－－－－－－－－－－－－－
本星期沽出
股份 股數 買入價 沽出價 盈虧（不計手續費）
－－－－－－－－－－－－－－－－－－－－－－－－－－－－－－－－－－－－－－－－
中交建 ２０００股 ９﹒５２５元 １０﹒００元 ９５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：６１２００元
剩餘現金 ：１０６４８元
組合淨值 ：７１８４８元
組合本周收益表現：－ ０﹒８％
組合本月收益表現：－ ０﹒５％（截至上月底止組合淨值：７２１９４元）
組合累計收益表現：＋１０﹒５％（本金６５０００元）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
