清明時節難得不是雨紛紛,噚日(4日)同家父登山祭祖,喺香江唔少山頭都保留住山墳,四周係完整翠綠嘅青山,拜祭嘅人埋沒其中,同自然混為一體,喺祖先天地之間放下自己嘅身段。不過喺古臣家鄉,內地政府就曾經要求祖先山墳移遷,以配合開山平地嘅都市發展政策。所謂發展才是硬道理,神州講到錢,其他事情都可以放埋一邊。
*突如其來的新區,沽唔走而得來的意外之財*
星期一(4月3日)孖屐突如其來一個「雄安新區概念」,話阿爺打算大力發展河北雄安,鄰近天津北京,一班河北概念股乘勢而起,當中金隅(02009)當日更加高開24巴仙。而金隅上星期三(29日)收市後放榜,業績幾靚仔,純利升三成三,派末期息4﹒6分人仔。誠如上星期所講,古臣仲諗住第二日(30日)會嚟個高開,等古臣有機會喺至少3﹒4銀時沽走佢。點知金隅同大市一樣都係一池死水,古臣掛出嘅3﹒4銀沽盤一直都成交唔到。
不過世事真係出乎人意料,突然殺出個「雄安概念」,星期一金隅高開後更加升到最高
4﹒7銀創近兩年新高,古臣當然慶幸之前沽盤無成交到,可惜古臣經驗尚淺無賺盡,草草於十點半左右喺4﹒19銀沽走咗。望住金隅最後收報4﹒35銀,都後悔沽得太早,時機呢樣嘢,古臣真係要學吓點把握。
*對沖令人無懼風浪,兩星期後再會*
四月市況係點,古臣都好難估,因為好淡因素都有。好方面北水似乎仲未離去。淡方面法國會有第一輪總統大選,一旦衝擊咗匯市,本港股市都會影響埋。所以古臣選股難度又高咗。不過,師兄Philip又提醒咗古臣,可以利用大學時學到嘅期權,去幫自己個倉對沖吓,有兩手準備,應該無懼任何風浪,將來古臣會再考慮一吓買少少期權。
古臣誤打誤撞之下,金隅幫古臣帶嚟約四成回報,真係人生第一次!住13樓嘅盈盈仲因此走嚟問古臣點炒股,其實古臣仲要向唔同前輩學習,邊有資格教人住呢?不過古臣打算乘機去個旅行,獎勵一吓自己,雖然未來兩星期古臣都會身在東瀛,不過仍然會留意環球市況,喺櫻花樹下再細讀投資經典,增強自己投資能力搵出下一隻金隅。大家兩星期後再見啦!
表列截至4月5日止投資組合表現:
股份 股數 買入價 現價 總值
----------------------------------------
匯控 400股 63﹒00元 63﹒10元 25240元
----------------------------------------
本星期沽出
股份 股數 買入價 沽出價 盈虧(不計手續費)
----------------------------------------
金隅 10000股 3﹒02元 4﹒19元 11700元
----------------------------------------
股票市值 :25240元
剩餘現金 :52448元(扣除沽出金隅的100﹒23元手續費後)
組合淨值 :77688元
組合本周收益表現:+10﹒7%
組合本月收益表現:+ 7﹒6%(截至上月底止組合淨值:72194元)
組合累計收益表現:+19﹒5%(本金65000元)
*數據截至今日11:30am
全新節目《說說心理話》原生家庭對成長有咩影響?改善溝通有計可施?► 即睇