各位朋友，古臣從東瀛旅遊返嚟啦！放假期間，朝鮮半島政局波譎雲詭，金仔（金正恩）仲曾經話一星期射一次導彈，嚇到古臣鼻哥窿都無肉，怕從此絕筆，返唔到香江。好彩最後平安抵港，而魚缸雖然變弱咗，但大半個月以嚟，好淡雙方都似乎努力於兩萬四之間拉鋸
，古臣希望一班好友可以大獲全勝！
＊東瀛買股票，佣金唔算平＊
去到東瀛名古屋，撞正春雨綿綿之日，粉紅色嘅櫻花徐徐飄落，灑落於行人嘅身。正當古臣打算出發去櫻花公園之時，就經過一間東海東京證券。於是古臣入去用半桶水日文同嗰度嘅（女）職員交流。
原來，以前喺東瀛投資所得，要交２０﹒３１５％嘅所得稅，一年古臣唔知跑唔跑到呢個回報！後嚟當地政府就設立咗ＮＩＳＡ計劃，可以理解為「日本小額投資免稅制度」。
「想買股票嘅話，請開設呢種戶口。」職員姐姐用溫柔嘅聲線話。
根據計劃，依家只要每年投資限額係喺１２０萬日圓以內，５年之內就可以免稅，而投資人士只要係２０歲或以上就開得呢個戶口。
「咁買賣股票時嘅手續費又係幾多呢？」古臣一邊講一邊做埋手勢咁問。
「嗯……你問得好好啊（第一次畀東瀛妹讚）。手續費的話，買得愈大金額，我哋公司收取嘅手續費會愈平。比如話，透過網上落單嘅話，假設交易金額係２５萬日圓，手續費會係
１６２０日圓。至於５０萬日圓交易金額嘅話，手續費就會係１８６３日圓，手續費比率由
０﹒６％下調到０﹒４％。」
古臣合指一算，只要做一單大約１７６４０港紙嘅交易，大約要畀１１４蚊手續費，同喺香江透過銀行買賣股票嘅佣金差唔多，至於本地券商，買港股嘅佣金收費就平好多啦，普遍都係收你５０蚊最低佣金。但係買日股就唔同，古臣上過去一間本地券商個網頁度睇，原來喺香江用佢哋平台買日股，最低佣金收費要２５００日圓，即大約１７６蚊港紙，感覺上好貴呀！
＊科技融入生活，收銀完全唔使人手＊
閒遊東瀛市內，發現同香江唔同之處，除咗風土人情，仲有就係自動化嘅程度。喺名古屋
ＧＵ購物，埋單之時先發現原來店內已經唔採用人手收銀，而係全場自動化，不論現金找贖，抑或信用卡，又或要修改褲頭，都可以透過機器搞掂。古臣諗起盈盈講Ｄ科技嘢，嚟到東瀛先感受到呢個民族嘅科技幾咁先進。
如果話五十年代工業係世界大潮流，咁呢個年代相信科技係世界嘅大潮流，所以花旗
Ｔｅｓｌａ、Ｆａｃｅｂｏｏｋ、Ａｐｐｌｅ、以至於香江上市嘅騰訊（００７００），升幅都以倍計。隨住流動支付普及，早前Ｖｉｓａ亦公布咗亮麗嘅業績，回望香江，搞網上支付搞得最大嘅，莫過於騰訊，微信支付市佔率已經逼近龍頭支付寶。
長假期後返來，古臣亦認為係時候檢視一吓投資組合。匯控（００００５）早前用晒回購嘅額度，股價暫時未見太大起色，好在歐洲嗰邊政局唔算動盪。不過，既然匯控回購額度用完，古臣當初買入嘅理由就已經唔再有效，於是古臣打算於６５蚊左右就沽走，然後等騰訊回落返
２３０蚊左右再換馬！
表列截至４月２６日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
匯控 ４００股 ６３﹒００元 ６４﹒２５元 ２５７００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：２５７００元
剩餘現金 ：５２４４８元
組合淨值 ：７８１４８元
組合本月收益表現：＋ ８﹒２％（截至上月底止組合淨值：７２１９４元）
組合累計收益表現：＋２０﹒２％（本金６５０００元）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
