香江噚日（２３日）打十號風球，阿臣偷得浮生半日閒，砌完新買嘅
Ｌｅｇｏ（講真阿臣其實有Ｄ興趣炒賣Ｌｅｇｏ），又研究吓股票，再諗下未來嘅部署。近日個別大藍籌放晒榜，接下來要等嘅就係內地錢莊放榜，不過內地錢莊就算表現好好，阿臣都怕其他股份因為已經徘徊高位多時，大戶會割禾閃人，拖累返港股表現。話晒８月份仲有幾日就完，阿臣都係步步為營至上，放眼於９月份嘅部署。
＊香江染紅，國指擬納紅籌民企代表性加上＊
香江政府星期日（２０日）喺青嶼幹線大嶼山同馬灣收費廣場實施雙向收費，而星期一
（２１日）撞正第一個返工嘅日子，青嶼幹線即刻大塞車！搞到咁，全因管理做得太差所致。而青嶼幹線實施雙向收費，都係為配合將來港珠澳大橋通車，加強中港融合。查實，阿臣近日喺屋企睇企業Ｄ業績報告時，都發現大部分公司份業績係用人民幣作報告，可見喺香江上市嘅內地公司愈來愈多，阿臣只怕遲下香江真係全片染紅都未定。
講到中港融合，股市體現唔少。而令阿臣吃驚嘅，就係國指未來大執位，將會加入１０隻大型紅籌同民企股。當中ＱＱ（００７００）、祖國移動（００９４１）、舜宇（０２３８２）、瑞聲（０２０１８）都係大熱，國指代表性隨時追過恒指。既然大勢如此，呢一點係咪可以為缸友帶嚟一點尋寶嘅啟示？
＊恒大安踏升幅可觀，開展升勢前已見炒作＊
講起民企，恒大（０３３３３）都認真出色，公司下星期一（２８日）先放榜，今個星期一（２１日）就大漲近１８巴仙。阿臣見住恒大係咁升，不禁要讚下華置（００１２７）老闆犀利嘅投資眼光。
事關華置早喺４月開始，陸續買入咗恒大股份，４月份恒大股價都只係喺大約７蚊或８蚊附近上落，至今恒大股價就已經廿幾蚊，升幅約２倍，不可不謂眼光獨到。
同樣係民企嘅安踏（０２０２０），唔經唔覺由廿銀升到上卅銀，公司喺３月亦擬以先舊後新配售１﹒７５億股，配售價２１﹒６７銀，消息公布後股價大跌，不過之後就喺２２蚊附近徘徊。依家股價升到逾３０銀，升幅約四成。
＊大投資者動作背後，或者蘊藏著更多訊息＊
阿臣睇過介紹財技嘅書本，開頭都係向人講解配股，佢哋咁編排嘅原因係：配股係財技入門招式。更進一步說，配售價可以作為散戶入市嘅參考指標。財技一派理論認為，如果承配人能夠喺股價上揚時得益，同承配人用相同成本接貨，坐艇機會就會低Ｄ，因為股價大插時承配人一樣要蝕錢，有違佢哋承配股票嘅初衷。當然，呢Ｄ只係分析嘅其中一種方法，唔可以解釋晒所有股市嘅現象。
不過，以安踏嘅情況嚟睇，呢套分析方法確係咁啱解釋到。究竟事實係點，阿臣唔知道。不過能夠用咁多錢去承接股票，都絕唔係普通散戶做到嘅事。而散戶如果跟華置一樣買恒大，到如今都一樣賺到笑。所以阿臣體會到，有時從大投資家或投資出名勁嘅公司嘅財技動作，話唔定都可以一葉知秋，從中睇出呢類大戶對後市嘅睇法。畢竟佢哋出入中環做生意，收到嘅市場資訊都比散戶要快要多，而睇法亦都比散戶精準。總言之，股市係由「人」參與嘅世界，並唔係純理性嘅數字就可以解釋到晒所有股市嘅現象。
表列截至８月２４日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
長和 ５００股 ９９﹒６元 １０２﹒１０元 ５１０５０元
美股：
Ｔｅｓｌａ ２股 ３１６美元 ３５２﹒７７美元 ７０５﹒５４美元
＃（約５５２１港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８２５４計算
股票市值 ：５６５７１元
剩餘現金 ：３１９３４元
組合淨值 ：８８５０５元
組合本月收益表現： －０﹒４％
組合累計收益表現：＋１８﹒０％（本金７５０００元計）（２０１６年８月開倉）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
