８月就嚟終結，魚缸今個月計埋今日（３０日）曾經兩度升破兩萬八，禮拜一（２８日）首次破關，當日同８月９日魚缸突破高位見２７８７６點一樣，尾市都係回落返。８月９日之後，缸友仲趁肥仔金搞搞震時質低個孖屐，不過半個月後魚缸又再創逾兩新高，所以暫時阿臣仍然覺得個孖屐仲有上升空間喺度。
＊「水」為動力，魚缸強而美金弱＊
香江過去連續兩個星期都打大風，十分罕見，阿臣希望澳門嘅同胞可以快Ｄ從風災中恢復元氣。颱風呢樣嘢好神奇，經過海水會增強，著陸後先變弱。魚缸亦一樣，孖屐升多數都係一個簡單原因－－有水湧入。所以之前北水湧入，外圍熱錢湧入，基金資金湧入，造就魚缸呢逾半年嘅升勢。
所以，要估大市去向，阿臣一貫都鍾意留意資金面，得閒望下匯市走勢。最近在岸或離岸人仔都好強，離岸人民幣ＣＮＨ今朝又創１４個月新高，試過去到６﹒５８７３，兌美元破咗
６﹒６嘅位置。阿臣發現，魚缸同國貨今年嘅升勢，原來同美金呈反向走勢。即係話，美金一路走弱時，魚缸同國貨就一路係咁升。
＊人仔走強利大市，趨勢暫未逆轉＊
如果阿臣以噚日（２９日）魚缸收市點數去計，今年升幅逾２６巴仙；至於國貨方面，升幅逾２０巴仙。呢段期間，美元兌人幣匯價（以離岸計）跌逾５巴仙。人仔相對強咗，有咩啟示呢
？人仔走強，會令好多中資公司估值得到提高。首先，某Ｄ內房股出名外幣負債較高，好似中海外（００６８８）同恒大（０３３３３）咁，部分內房發行債券亦可能係出於套利，所以人仔升值對內房嚟講係好事，可以從中獲益。
其次，人仔升值，對國內保險公司亦著數，因為佢地持有人仔資產投資，外幣資產相對少，人仔升值情形下對保險公司估值有ｓｏ。
以上幾點，道出咗美金走弱對中資股嘅好處。業績期就來完結，好多人見到魚缸升上兩萬八呢Ｄ位置都不知所措，阿臣亦如是。依家美元兌人仔破咗６﹒６嘅關鍵位置，股份估值提升，所以阿臣會肯定魚缸個市繼續有得升。除非美元兌人仔突然嚟個完全大逆轉，否則阿臣都覺得唔使考慮沽貨離場住。
＊金仔發惡，新Ｂ望帶來短暫和平＊
金仔噚日又發顛，發射導彈橫越東瀛國土，嚇到投資者避險催升日圓，魚缸亦借勢回調。不過依阿臣睇，近日有消息傳出話金正恩新ＢＢ出世，金仔一定十分開心。歷史上日本戰國時代豐臣秀吉都因為新ＢＢ出世而暫停進攻朝鮮，喺新嬰誕生呢Ｄ時候，金仔應該都唔會搞風搞雨住，所以阿臣相信個孖屐唔會咁快逆轉。
至於股份方面，阿臣近日內房股深圳控股（００６０４）有Ｄ興趣，皆因各項財務比率公司都比同業好，不過股價並唔係升咗好多，阿臣仲睇緊股價受限制嘅原因，如有策略部署再同大家分享！
表列截至８月３０日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
長和 ５００股 ９９﹒６元 １００﹒８０元 ５０４００元
美股：
Ｔｅｓｌａ ２股 ３１６美元 ３４７﹒３６美元 ６９４﹒７２美元
＃（約５４３６港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８２４８計算
股票市值 ：５５８３６元
剩餘現金 ：３１９３４元
組合淨值 ：８７７７０元
組合本月收益表現：－ ０﹒８％（截至上月底止組合淨值：７８４３６元）
組合累計收益表現：＋１７﹒０％（本金７５０００元計）（２０１６年８月開倉）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
