魚缸踏入９月份，主要係下跌收場，不過由於人仔繼續走強，所以阿臣認為孖屐大方向都係向上為主。另外，近期細價股又有返Ｄ起色，阿臣唔排除近期孖屐開始轉變炒作對象，始終大股都升咗好一排，資金追逐返一Ｄ價值太低殘嘅細股都無可厚非。
＊炒股如炒Ｌｅｇｏ，供求影響價格＊
古臣近日咁啱畀《笑傲缸湖》任盈盈發現咗，自己連Ｌｅｇｏ都炒埋。Ｌｅｇｏ新出嘅星球大戰「千年鷹號」，舊版十年內最多炒起咗５倍，原因係件產品停產，孖屐上供應有限，供不應求之下，價格自然大升，基本上同股市一樣。不過，依家無星球大戰電影推出，如果唔係，食住電影個勢，唔單止新版，舊版炒風都可以更加旺盛！
已故嘅曹ｓｉｒ曾講過嘅「有智慧不如趁勢」，阿臣一向都深感認同。長揸當然唔使理會短期勢頭，但短炒的話就要密食當三番，盡量喺短時間之內賺到利潤，跟勢炒，亦都係一種相對容易嘅玩法。最考技術嗰吓，都只係幾時落車而已。
業績期完結之前，內房股成為孖屐焦點。不過依家業績期完咗，孖屐嘅焦點放多咗喺其他地方度，阿臣決定撥少少資金短炒一吓，賺Ｄ錢為調整時撈貨之用。
＊人仔繼續升，利好紙業股＊
上星期話口未埋，人仔就繼續急升，噚日（５日）最多試過報６﹒５１７２。既然升破咗６﹒６嘅位置，將來兌６﹒４亦不遠矣。依阿臣嚟睇，上星期五（９月１日）花旗國公布嘅８月非農就業職位只係新增１５﹒６萬，遠差過預期１８萬，唔排除會令投資者困惑，令佢哋覺得美金會弱返一排，以催谷出口同經濟。另外，地緣政局繼續唔穩定，金仔發惡程度十分頻密，亦令到投資者買入日圓避險。日圓強咗美金相對就弱，美金弱人仔又相對強，所以阿臣認為人仔首階段有機會升破６﹒５，之後再逼近６﹒４。
人仔強，有利依賴進口原料嘅紙業股，所以近來好似理文造紙（０２３１４）、玖龍紙業（０２６８９）、晨鳴紙業（０１８１２）等股份都有唔錯嘅走勢。由於阿臣希望短炒，加上資金有限，所以傾向市值相對細Ｄ嘅晨鳴，嚟緊會喺１２蚊附近買入２０００股，目標係希望佢升到上１３個幾銀，都有一成回報！
表列截至９月６日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
長和 ５００股 ９９﹒６元 ９９﹒３０元 ４９６５０元
美股：
Ｔｅｓｌａ ２股 ３１６美元 ３４９﹒５９美元 ６９９﹒１８美元
＃（約５４７１港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８２４９計算
股票市值 ：５５１２１元
剩餘現金 ：３１９３４元
組合淨值 ：８７０５５元
組合本月收益表現：－ １﹒４％（截至上月底止組合淨值：８８３１４元）
組合累計收益表現：＋１６﹒１％（本金７５０００元計）（２０１６年８月開倉）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
