上星期唉瘋８（ｉＰｈｏｎｅ８）開賣，新機反應比想像中冷淡，炒價都唔係咁靚，反而果粉因為唉瘋７平咗好多嗱嗱臨走去買。阿臣問過，目前市面Ｄ門市都得返唉瘋７＋賣，而唉瘋７已經無貨。原來蘋果嘅新機，有時都唔係咁受歡迎，世事往往就係咁難料。
＊越地定下止蝕位，美元兌人幣反彈＊
股市亦如是。佛經話世事無常，世人毋須害怕轉變，而要接受世事常變嘅事實。所以魚缸星期一（２５日）跌成３８０點時，阿臣都只好以此嚟自勉。當日跌得最多嘅板塊，莫過於之前狂升嘅內房，阿臣手上隻越秀地產（００１２３）當日跌逾８％，而晨鳴紙業（０１８１２）當日跌近５％。至於大市方面，經歷過星期二（２６日）窄幅微升後，捱到今日上午終於反彈多咗，一度上返五十天線（約２７５３０點），一眾內房都反彈得多咗。今朝呢一吓反彈，強者弱者一目了然。回購股份嘅碧桂園（０２００７），仲有之前大炒嘅佳兆業（０１６３８），上午升幅都比越地多，即係越地上升動力無咁大，阿臣決定唔加碼越地，由佢繼續放喺度，同時定下止蝕位，跌穿１﹒４銀時就唔猶豫斬纜。
阿臣望一望美匯走勢，發覺美元兌人民幣已經上返６﹒６水平，即係人仔升完一排後依家回調返，咁中資股估值又會相對降返少少，紙業股可能亦受影響，有見及此，阿臣就打算最少喺
１４至１４﹒５銀之間沽出晨鳴（０１８１２），喺市況唔明朗之下攞返Ｄ資金先。
＊或是時候趁低吸納，中細價股可留意＊
如果未來一個星期之內，魚缸都升唔返上九月嘅高位（約２８２４８點）的話，咁個勢就真係回調。不過，阿臣覺得就算回調都只係屬於牛二嘅回調而已，所以阿臣又唔係咁恐慌，反而諗緊機會準備趁低吸納，就好似股神巴菲特名言：「別人恐懼我貪婪」。阿臣亦會開始留意一Ｄ市值細Ｄ嘅中價股或細價股，以待牛三來臨時，市值未過千億嘅股份可以爆升。
阿臣睇返，發現之前賣咗殼，前稱保興資本、天順證券嘅民銀資本（０１１４１）最近都升咗唔少，暫時就喺０﹒７水平上上落落。公司九月初時表示，獲民生商銀入股，民生商銀背後就係民行（０１９８８），係民行喺本地設立嘅子公司。民銀資本得到民生商銀嘅支持，正拓展緊投行業務，有民行照住，公司前景似乎好強勁。滬深港通效應今年開始見效，而未來中港兩地金融市場又不斷加深融合，券商投行業會長做長有，不過效應要慢慢顯現出來。從月線圖嚟睇，股價處於上升趨勢，就算升到１蚊，市值都未過５００億銀。不過呢隻股份波幅可以好大，而且未必短期內快速爆升，阿臣都唔敢貿然追貨，喺０﹒７銀之下先會買！
表列截至９月２７日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
晨鳴 ４０００股 １２﹒１０元 １４﹒６０元 ５８４００元
越地 ２００００股 １﹒５４元 １﹒５６元 ３１２００元
美股：
Ｔｅｓｌａ ２股 ３１６美元 ３４５﹒２５美元 ６９０﹒５０美元
＃（約５３９１港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８０６７計算
股票市值 ： ９４９９１元
剩餘現金 ： ３０７８元
組合淨值 ： ９８０６９元
組合本月收益表現：＋１１﹒０％（截至上月底止組合淨值：８８３１４元）
組合累計收益表現：＋３０﹒８％（本金７５０００元計）（２０１６年８月開倉）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
