阿臣上星期四（９月２８日）用１４﹒６銀沽走晨鳴（０１８１２）之後，用少少錢喺０﹒６４銀買入咗民銀資本（０１１４１）。民銀資本波幅果然好大，上星期五（２９日）當日最低更加震到落０﹒５８銀，不過之後竟然有買盤買返上去，令阿臣來回完地獄一片又倖免於難。阿臣心諗，買得就唔好後悔啦，況且都只係兩萬股啫！
＊重組股份有得炒，嘉域、佳兆業最佳例子＊
上星期有隻名叫嘉域（００１８６）嘅股份復牌，公司以前因為虧損加聯營違約而被債權人申請清盤，但之後公司重組再成功將負債由２１億削剩２億，依家公司又「翻生」。股價今年曾經去到０﹒２３５銀水平，近排公布咗控股權易手細節之後，最高去到０﹒８７銀，同今年最低價比升幅有２﹒７倍。
唔搵隻咁「乾」嘅股份嚟講，睇吓佳兆業（０１６３８）。該股２０１５年起停牌，經過一輪重組之後，今年３月復牌，最高見６﹒９１銀，比停牌前收市價１﹒５６銀高出３﹒４倍。由此可見，重組股或者有白武士入主嘅股，都唔係無投資價值，而且升值潛力十分高。以後阿臣又多一類股份可以留意啦！
＊市場購買力夠強，港股大時代高位望突破＊
唔經唔覺，今年話咁快今日（４日）又中秋，經歷完噚日（３日）魚缸一下大升之後，阿臣個倉又恢復返ＤＤ生氣。事關阿爺一句話「定向降準」，全城就熱炒內地放水。不過，阿爺係預告下年先實施，噚日大市飛起逾６００點，阿臣都覺得係反應過龍。不過，以好友嘅攻勢嚟睇，市場購買力仲係好強，即刻又掃一掃走咗阿臣嘅焦慮。
可惜內地始終係過緊十一黃金周，大市成交點都唔會強得去邊，魚缸短期內都難以有大時代咁款嘅升勢。但魚缸萬一窄幅波動，亦可以畀投資者慢慢收齊貨。始終阿臣有信心大市可以突破大時代高位２８５８８點，所以現階段Ｄ股都係未升完！
阿臣粗略地搵咗一堆走勢唔錯嘅股份，當中包括中海物業（０２６６９）、海螺水泥
（００９１４）、西部水泥（０２２３３），其中中海物業阿臣想喺２蚊左右買入，然後期待升勢延續。睇嚟今晚阿臣只能對月許願，希望港股呢段光芒唔好咁快完結，可以普照每個投資者，一如八月十五夜嗰一輪澄月一樣。
表列截至１０月４日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
越地 ２００００股 １﹒５４元 １﹒６２元 ３２４００元
民銀資本 ２００００股 ０﹒６４元 ０﹒６６元 １３２００元
美股：
Ｔｅｓｌａ ２股 ３１６美元 ３４８﹒１４美元 ６９６﹒２８美元
＃（約５４３８港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８０９４計算
上星期沽出
股份 股數 買入價 沽出價 盈虧（計及手續費）
－－－－－－－－－－－－－－－－－－－－－－－－－－－－－－－－－－－－－－－－
晨鳴 ４０００股 １２﹒１０元 １４﹒６０元 ９８８１﹒５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５１０３８元
剩餘現金 ： ４８４９１元
組合淨值 ： ９９５２９元
組合本月收益表現：＋ ０﹒５％（截至上月底止組合淨值：９８９９６元）
組合累計收益表現：＋３２﹒７％（本金７５０００元計）（２０１６年８月開倉）
＊數據截至今日１１：３０ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
