今日(31日)係10月最尾一日,今個10月香江魚缸可以話係十分「精彩」,先係跟住花旗國跌出兩條下跌裂口,連失26000同25000關口,魚缸到目前為止,已經由年初高位重挫二成,高低波幅達8000多點。今個份更是連續第六個月下跌,係1982年以來最長的跌勢,認真頭痛啊。
不過,其實除咗股市,債市嗰邊今個月都好熱鬧。花旗國十年期國債孳息率喺今個月頭破頂,突破咗2011年5月以來高位,一度高見3﹒26厘,一眾香江高息公用股自然當災,一般嚟講,股息要同美債有起碼一厘差距先算抵買,一眾高息公用股股價當然要跌啲,先可以拉返高個股息啦。
*美債十年息或再升,熊市收息股普遍高位跌兩三成*
魚缸跌到低殘,好多收息股嘅估值都變到十分吸引,依加會唔會係一個時機去撈底呢?
或者先講講一份由瑞信發表研究報告啦!早排瑞信發表研究報告對比咗,幾隻公用股股息同美債之間嘅息差有幾多,其中溢價最低嘅中電(00002),所以大家都睇到中電喺9月中見高位97銀之後,回落超過10銀咁多,現時股息率大概3﹒4厘;另一方面溢價最多嘅係電能(00006)同長建(01038),有多過一厘差距,現時股息率大概有5﹒5厘同4﹒5厘。瑞信嘅投資策略及研究主管話,美債十年息升至3﹒22厘至3﹒25厘會遇上技術阻力,但之再上不足為奇,即係話收息股仲有可能再跌。
除咗債息抽升,另一個困擾高息股嘅當然係魚缸走勢喇,現時魚缸處於熊市幾成定論,而根據統計,一旦遇上大跌市或熊市,好多高息股都會自高位回落兩三成以上。上次2008年大跌市,魚缸自高位回落61巴仙,中電由2008年5月嘅70﹒5銀水平,跌四成到當年10月初份嘅41﹒65銀;領展(00823)由2008年1月嘅19﹒71銀水平,大跌四成六到當年10月見10﹒69銀。再近啲嘅2011年,魚缸喺2010年11月嘅24964點,跌到2011年10月嘅16250點,跌幅達35巴仙,其間電能(00006)由2011年7月下跌一成九到2012年1月嘅52﹒55銀先喘定;而大象(00005)就由2011年2月嘅91﹒9跌三成九到2011年11月嘅56銀。所以缸友除咗考慮美債息高低,仲可以計計呢類高息股,自高位回落幾多,先考慮係咪買入呢類股票,慎防賺息蝕價。
當然選股仲要睇盈利同主要業務喺未來嘅前景,提提大家今年開始幾隻收息股嘅前景都有變,好似港鐵(00066)今年開始要捱義氣,分擔高鐵開支,而港通(00032)會喺今年交還大老山隧道經營權畀政府,2023年會再交還西隧經營權,但暫時未知會唔會續期,所以缸友們就算買落收息股之後,都要留意住佢哋嘅前景,千祈唔好唔理啊!
*神州經濟數據麻麻,魚缸或要下試24087點*
講返阿臣個倉。
魚缸自上周四裂口低開後,多次觸及24500左右位置後即見反彈,反映呢個位置有支持,但經濟明顯不景,今日剛剛公布嘅中國官方PMI遜市場預期,反映多項救市政策未見成效,貿易戰導致企業工業生產增速有抑制,魚缸再下試不足為奇,以黃金比率計現時魚缸自高位已失守0﹒5水平(25881點),若港股於24500失守後,下一個支持位,將回落至黃金比率調整0﹒618水平(24087點)。
個股方面,個倉帳面仲有賺嘅只有粵海投資(00270),而其他幾隻魚毛都要蝕價,恒大(03333)發債撲水,債息高逾13巴仙,但反應似乎唔太理想,同時呢個舉動亦間接推高整個內房債嘅息率,就算早前有傳國家隊針對喺A場買入內房股,前景都唔太理想,阿臣諗緊可能等反彈到20銀就走人。另一隻寶勝(03813)就喺彈返上買入價之後再沽出。
表列截至10月31日(11:00am止)投資組合表現:
股份 股數 平均買入價 現價 總值
----------------------------------------
港股:
恒大 1000股 25﹒95元 18﹒22元 18220元
寶勝 10000股 1﹒56元 1﹒50元 15000元
粵海投資 2000股 13﹒00元 13﹒94元 27880元
領展 500股 75﹒35元 70﹒05元 35025元
----------------------------------------
股票市值 : 96125元
剩餘現金 : 46759元
組合淨值 :142884元
組合本月收益表現: - 5﹒1%(截至上月底止組合淨值:150634元)
組合累計收益表現: + 36﹒1%(本金105000元計)(2016年8月開倉)
*數據截至今日11:00am
全新節目《說說心理話》青少年不可以戀愛!?真實個案講述驚心動魄經歷► 即睇