上星期三（７日）花旗國中期選舉有結果，一如大家所料由民主黨拎到眾議院控制權，共和黨保住參議院，呢個結果可能對侵侵嘅內政嘅影響多啲，而貿易戰去向就仍然有待觀察月底「習特會」嘅發展，所以今個星期魚缸走勢相對靜局，而且「孖屐」等緊今日（１４日）企鵝仔（００７００）業績，相信如果業績唔太好，魚缸可能就要進一步尋底，缸友們都要注意啊！
＊企鵝連遭打壓，業績難見起息＊
講返企鵝仔先，今年似乎犯太歲，遇著魚缸由歷史高位碌返落嚟之餘，又畀南非大股東（Ｎａｓｐｅｒ）掟貨，今年第二季業績又唔係好掂，跟手阿爺又出手打壓手遊行業，第三季業績可能會凍過水？
不如聽吓幾間大行對企鵝仔嘅分析先。古臣睇過幾份券商報告，佢地都認為今次第三季嘅純利介乎喺１６５﹒８４億至２０６﹒２億人仔，用中位數１８６﹒９３億人仔，同去年同期１７０﹒７億人仔比較按年升９﹒５巴仙，同上年增幅達４５巴仙計，增長明顯放緩好多。最新由高佬發表嘅報告都話，預計企鵝仔手遊收入增長、線上廣告收入增長同支付業務增長會放慢，但雲端業務就見增長。高佬調整企鵝仔盈利預測，手遊業務明年預測市盈率由３５倍降至２５倍。
其實，阿臣睇到自從企鵝仔第二季業務開始就痛失焦點，過往王牌手遊《王者榮耀》先畀一連串政策打壓，最近已經開始實施最嚴嘅限玩設置同實名制，令未成年用戶單日線上時間已經較去年高峰下跌約５２﹒３巴仙。而另一個可能係騰訊增長亮點嘅「食雞」遊戲（絕地求生）又遲遲未盈利化，有報道話神州網絡遊戲審批嘅「綠色通道」已經關閉，意味企鵝仔下半年遊戲業務增長難見升幅。
上一年大摩預測過，企鵝仔當年第３季手機遊戲收入有１７０億元人仔見新高，按年增長７２巴仙，睇嚟呢個數今年都幾難維持到喇！缸友最好都係留意埋神州對遊戲審批嘅消息，因為作為企鵝仔盈利推動力嘅主要引擎，如果呢個陰霾遲遲未散，唔只影響一季業績表現，接下落嚟嘅幾季表現都可能會走樣，股價當然都唔會好睇啦！
＊有波幅無咩升幅，本周按兵不動＊
講返阿臣個倉。
魚缸呢幾日繼續有波幅無咩升幅，貿易戰仍然影響大市氣氛，缸友們仍然有待觀察月底「習特會」嘅發展，噚日２０天線（約２５５４５點）失而復得，現時仍可企穩，不過如果今日企鵝仔表現麻麻，相信魚缸可能又要進一步尋底，睇返公仔圖魚缸由今年七月起營造四個浪，呈現一浪低於一浪嘅走勢，並營造緊第五浪。如果月底「習特會」未見成果加上今日企鵝仔表現麻麻嘅話，魚缸跌穿１０月３０日低位（約２４５４０點）機會都幾大，下一關可能要下試２３５００點先見反彈。
個股方面，粵海投資（００２７０）繼續強勢，阿臣當然唔會沽貨走人住，而其他幾隻魚毛就仍然蝕價，阿臣仍然等恒大（０３３３３）反彈到２０銀就走人。另一隻寶勝（０３８１３）噚日公布首三季純利為３﹒８９億人仔，按年升１５﹒５％，同上年比較跌３５﹒５％明顯有進步，股價應該都仲有上望嘅空間，所以阿臣今個星期繼續按兵不動。
表列截至１１月１４日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
恒大 １０００股 ２５﹒９５元 １９﹒１２元 １９１２０元
寶勝 １００００股 １﹒５６元 １﹒４９元 １４９００元
粵海投資 ２０００股 １３﹒００元 １４﹒０８元 ２８１６０元
領展 ５００股 ７５﹒３５元 ７２﹒０５元 ３６０２５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９８２０５元
剩餘現金 ： ４６７５９元
組合淨值 ：１４４９６４元
組合本月收益表現： ＋ １﹒３％（截至上月底止組合淨值：１４３１０９元）
組合累計收益表現： ＋３８﹒０％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
