萬眾期待嘅ＱＱ（００７００）終於喺上星期三（１４日）出咗第三季度業績，總算不負孖屐期望，合符預期為魚缸沖喜，星期四（１５日）嗰日為恒指帶來１３１點升幅，仲係升幅最大藍籌戰士，但係就始終上唔返３００銀關口。或者，投資者因為呢份業績，唔敢對佢第四季業績太樂觀有關？不過，講到第四季展望嘅時候，阿臣不如講一講第三季報告有咩要留意吓先。
＊季度業績好，有幾條救命草＊
ＱＱ第三季大數方面，純利就有２３３億（人民幣．下同），按年多賺３０巴仙，比之前孖屐預估嘅１８４億元為高；而非通用會計準則盈利就係１９７億元，按年升１５巴仙。
季內網絡遊戲業務收入方面，就按年跌４巴仙至２５８億，佢哋就話因為個人電腦遊戲收入下跌影響，好彩部分被手機遊戲收入增加所抵銷。講返過往重中之重嘅手遊業務，就按年及按季都有得升，分別增長７巴仙同１１巴仙到１９５億，但大家要留意有部分嘅收入，其實係嚟自社交網絡。
其次，今次支付雲同廣告方面嘅成績亦可以話係另一個焦點，保持都高增長。季內網絡廣告業務收入為１６２億，按年增長４７巴仙，按季增長１５巴仙，佔收入有四成半，可以話係呢份業績嘅救命草。不過，講到ＱＱ救命草又點止一條呢？或者等古臣同你逐個講啦！
傳統上，第三季都係遊戲商旺季嚟，只因有暑假，學生哥都願意投入更多時間喺遊戲到，自然更多人課金落手遊到啦，而且細心睇今次呢盤數，ＱＱ其實係畀少咗稅，同有一筆過投資收益，當中包括投資美團（０３６９０）上市嘅８７億收益，如果扣除呢一筆投資收益，今次核心盈利就只會係持平，唔會升到１５巴仙。同以往高增長嘅ＱＱ比較，第三季增長明顯放慢，或者咁就解釋到，點解大家對佢第四季同股價唔敢有太高期望。
＊高增長期已過寺，轉型需時＊
其實，喺呢份業績上，可以睇到ＱＱ似乎係想由過往食胡嘅遊戲業務中轉型，但過程會唔會係喺嚟緊呢季就做得到呢？好似今次雲服務成績確係亮麗，但盈收當然唔似遊戲咁有爆發性增長，而係需要時間經營，故轉型需時嘅情況下，ＱＱ仍然好難由手遊業務中走出嚟。
現時ＱＱ有１５隻遊戲已獲商業化批准，可以話係暫時遊戲業務嘅吊命草。但阿臣上星期所講，過住一直講緊可以取代《王者榮耀》嘅「食雞」遊戲（絕地求生）仍然遲遲未盈利化，喺「食雞」熱潮都開始退卻，未來網絡遊戲審批又未明朗之下，加上全球科技板塊疲弱，你話香江一眾科技股又點會有運行呢？所以喺未見「股王」有一個好強嘅增長嘅時候，睇嚟ＱＱ都只可以有反彈而唔可以話係轉勢住啊。
＊恒大反彈上２０銀沽貨走人＊
講返阿臣個倉。
花旗國嗰邊今個星期跌個不停，其中其中五大科技股ＦＡＡＮＧ（臉書、亞馬遜、蘋果、Ｎｅｔｆｌｉｘ、谷歌）已經步入技術熊市，而以今年計道指目前已經蒸發全年升幅，標指更加倒退逾１巴仙，納指就升０﹒１巴仙。
受花旗國魚缸拖累，香江呢邊都無運行，ＱＱ在內嘅一眾科技股被掟貪，恒指噚日（２０日）先唔見二萬六關口同１０天線（約２５９１６點），加上有傳聞話香江科技界人士向花旗國生產商落單嘅時候，已被列入同神州相同關稅區，短期嚟睇魚缸都幾難轉勢，大家都係留意月底「習特會」會唔會有咩成果再作部署。
個股方面，粵海投資（００２７０）繼續強勢，恒大（０３３３３）反彈到２０銀阿臣終於可以走人。另一隻寶勝（０３８１３）仍然未返家鄉，阿臣暫時未諗筆錢點用住，所以暫時揸住現金先。
表列截至１１月２１日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
寶勝 １００００股 １﹒５６元 １﹒４７元 １４７００元
粵海投資 ２０００股 １３﹒００元 １４﹒００元 ２８０００元
領展 ５００股 ７５﹒３５元 ７３﹒２５元 ３６６２５元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
賣出：
恒大 ２０﹒６元 １０００股 套現２０５５９元 －５３５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ７９３２５元
剩餘現金 ： ６７３１８元
組合淨值 ：１４６６４３元
組合本月收益表現： ＋ ２﹒５％（截至上月底止組合淨值：１４３１０９元）
組合累計收益表現： ＋３９﹒７％（本金１０５０００元計）（２０１６年８月開倉）
＊數據截至今日１１：００ａｍ
etnet榮獲HKEX Awards 2023 「最佳表現證券數據供應商」大獎► 了解詳情
