有朋友在幾個月前請食大閘蟹，有個好聽的名字，叫「六月黃」，其實是ＢＢ蟹，不但只得小小黃，蟹身亦非常削，於是我話膽固醇太高，一年只可以食兩三次大閘蟹，等大造才食，唔好浪費Ｑｕｏｔａ，較早前老友話九圓十尖，九圓啱造，我又話唔食，圓即是乸，蟹膏好似咸蛋黃一樣，唔覺得好食，都係唔好浪費Ｑｕｏｔａ，到最近，公蟹大造，我請食大閘蟹，老友話心領，因為這兩三個月食得太多「六月黃」及蟹乸，膽固醇太高，醫生唔准再食，明年請早，真浪費。
有很多香港人都好似我老友一樣，明知自己膽固醇過高，不能多食大閘蟹，最好辦法就是等到季尾，公蟹大造，又平又靚的時候才食，但他們大多數都受不了誘惑，食完「六月黃」食蟹乸，又貴又唔係咁好食，到公蟹大造，又平又靚，他們又唔能夠食，其實，買樓的人有同樣心態，今年初，無論買新樓或者二手樓，都冇乜選擇，買新樓入左飛之後仲要抽籤，抽得到都未必好揀到啱心水，但唔買又好似很浪費，大多數人都會勉為其難，造成新樓熱賣，往往一Ｑ清袋，唔買新樓，買二手樓仲慘，有錢都只能夠買到二樓後座的單位，慘過食「六月黃」。
近兩個月就比較好，新樓因為認購率不足，有錢可以慢慢揀慢慢買，最緊要是不用抽籤，啱就買，唔啱可以唔買，如果有心買二手樓的話，隨時可以買到一些平靚正單位，不過一定要花些少時間去搵，感覺上都好似食蟹乸一樣，久不久都有一隻唔錯，不過是可遇不可求，隔多幾個月，大約在春節之後，形勢就會完全不同，將會有多個新樓盤推出市場，樓價不但比現在平，而且會有更多選擇，更多優惠，去到新樓售樓部所得到的待遇，就會感覺到這才是買樓。
至於買二手樓，由於放盤的業主多了很多，買樓的人同樣可以慢慢揀，大膽還價，或者可以以合理價格買到適合自己的單位，那些早已買樓的人見到現在情況，應該後悔當日太早買樓，浪費了首置的丁權，現在再買並不是不可以，不過要付１５％印花稅，所以，買樓同食大閘蟹都是一樣，等大造時才買才食，才可以享受到消費者的權益。
《紀惠集團副主席及行政總裁 湯文亮》
etnet榮獲HKEX Awards 2023 「最佳表現證券數據供應商」大獎► 了解詳情
