新一年開始，又係時候檢討魚缸過去一年嘅表現，上個星期我哋就講咗傳統上「一月效應」嘅由來，今個星期阿臣就想講吓幾隻近期表現麻麻嘅新經濟股，事關呢啲近年上市嘅新經濟股「破發」其實唔係無跡可尋，如果缸友們有留意當中一啲新經濟股上市時嘅招股書，咁就應該識得沽貨走人，所以幾隻新經濟股入邊，阿臣就抽幾隻嚟講啦！
＊平安好醫生「舊經濟」色彩濃＊
由大環境去睇，幾隻最近幾年上市嘅新經濟股都有個特點，用高估值上市，首掛當日表現耀眼，但隨住下半年中美貿易戰加劇，大家嘅風險胃納縮細，幾隻新股就開始尋底之旅，而喺云云幾隻焦點新股入邊，平安好醫生（０１８３３）股價走勢可以話幾難睇，現時股價已經畀招股價無咗成一半，不過如果有睇招股書嘅缸友，就會發現咁跌法唔係無因由。
阿臣記得，平安好醫生未上市之前其中一個保薦人細摩都話好醫生要喺２０２０年先會賺錢，喺２０１８年虧損會收窄到９﹒３２億，２０１９年再收窄到３﹒９２億，要到２０２０年先會有首次盈利，但就會少於１億銀。
睇埋招股書，平安好醫生上市之前大打線上健康醫療服務，四大業務分別係「健康商城」、「消費型醫療」、「家庭醫生服務」同「健康管理和互動」，但買點之一，最有「新經濟」味嘅「家庭醫生服務」同「消費型服務」佔整體收入，就出現按年下跌，反而以零售為主嘅健康商城就達到整體收入嘅４８巴仙，換個角度睇其實平安好醫生似「做零售」多過線上健康醫療喎，反而「新經濟」味就好似無咩囉，所以如果以一隻未賺錢，而且以「賣藥」為主嘅魚毛嚟睇，估值幾多先合理呢？
再睇香江「超購王」毛記葵涌（０１７１６），由當時招股書入邊得知，毛記上市係依靠攪ｓｈｏｗ嚟壯大收入，即係一筆過收入活動策劃可以影響收入好大，２０１７年度因為無相關嘅大ｓｈｏｗ，所以收入大幅下跌，不過２０１８年毛記攪咗《東方昇特異功能救香港》個人騷，相關收入會喺年度業績入帳，相信基數效應下升幅會幾可觀，但阿臣想講部分「新經濟」嘅產業，如果熱潮一過，咁佢嘅收入就可能凍過水。
之前牛市大家風險胃納比較大，願意付出較多嘅溢價畀呢類新經濟股，但踏入熊市，大家可能就比較睇返股份嘅收入同基本面因素，嚟緊三月踏入業績期，如果大家仲有貨喺手，可能都要睇睇佢地上年嘅表現，或者缸友們會係當中搵到驚喜都唔定嫁！？
＊美國十年期國債回落，港股短期或有運行＊
講返阿臣個倉。
魚缸今年開局麻麻，不過又唔係無好消息，先係人行方面公布降準１巴仙，預計可以釋放１﹒５萬億人仔。花旗國方面，聯儲局主席鮑威爾加息立場「轉鴿」，亦令到一眾本地磚頭股受捧。加上影響魚缸主旋律嘅中美貿易戰都有好消息傳出，侵侵話雙方會談順利惹嚟憧憬，花旗國１０年期收益率隔晚報２﹒７１２％，比上星期曾經去到２﹒５５％有明顯升幅，債息升債價跌，意味資金由債券市場流出，美金亦由高位回落唔少，所以港股短期或者會有一陣反彈，但睇返公仔圖，如果魚缸可以升破上個月高位２７２６０點，似乎先可以話轉勢。
個股方面，動盪市之下，資金再走入公用股避險，粵海投資（００２７０）同領展（００８２３）走勢仍然都唔錯。其中領展噚日（８日）又創新高８１﹒９５銀，今日（９日）似乎又想再試高位，所以阿臣繼續放住紙鳶先。新巴城巴獲准加價，阿臣睇到新創建（００６５９）近呢個月表現唔錯，加上業績好睇，現時考慮緊咩位買入好。
表列截至１月２日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
寶勝 １００００股 １﹒５６元 １﹒５０元 １５０００元
粵海投資 ２０００股 １３﹒００元 １５﹒４０元 ３０８００元
領展 ５００股 ７５﹒３５元 ８１﹒３５元 ４０６７５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ８６４７５元
剩餘現金 ： ６７９７１元
組合淨值 ：１５４４４６元
組合本月收益表現： ＋ ０﹒９％（截至上月底止組合淨值：１５３００１元）
組合累計收益表現： ＋４７﹒０％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
