近排魚缸熱炒嘅板塊當然係５Ｇ概念啦，其中隻鐵塔（００７８８）上星期五（２５日）曾經破頂見過１﹒７６銀，已經到接近各大行嘅目標價，現時仲係買入嘅時機？
＊５Ｇ起網開支大，用戶亦未必有大需求＊
５Ｇ比起４Ｇ速度可以話係一個大躍進，比４Ｇ快十倍，而相關嘅科技亦都可以應用喺無人車，甚至因為速度嘅提升，一啲大型機械都可以用遙控控制，所以５Ｇ嘅應用唔一定只係喺手機上邊，其他範疇都可以用到。
講返５Ｇ喺神州嘅發展先。上個月嘅中央經濟工作會議，已經講明要工信部要發展智能製造、信息消費同５Ｇ，預測２０２０到２０２５年可以直接帶動經濟總產出１０﹒６萬億人仔，五年內創造３１０萬個就業崗位。現時神州三大電訊營運商已經公布咗５Ｇ時間表，預計今年第三季喺神州主要城市商用，最快２０２０年先全面落實民用化。
５Ｇ概念股選擇多多，先講中資電訊三寶。上年三隻股份因為中央要求「提速降費」令到股價長期麻麻，不過隨住相關政策開始畀「孖屐」慢慢消化，加上５Ｇ概念炒起，三股近排走勢都唔錯。有藍燈籠之稱嘅中移動（００９４１）近排已經上返８０銀關口兼企穩，中電信（００７２８）走勢更靚仔，一條完美上升軌，不過中聯通（００７６２）走勢就相對麻麻。其實撇開５Ｇ去講，電訊商提供股份簽咗單之後，就會有穩定嘅現金收入，而且到呢個時代人人都要網絡，故電訊股一早已經係半隻公用股。
但講返今日嘅主旋律５Ｇ，對中資電訊三寶都唔係無憂慮，由於５Ｇ嘅穿透極差，要興建大量基站，每個基站嘅價錢係４Ｇ嘅一倍，其實現時起網對三大電訊商係一個大開支，未來仍然未知可唔可以回本。再講，試諗諗現時４Ｇ對一般用戶嚟講係咪唔夠用呢？或者如果到時候５Ｇ ｐｌａｎ收費會係幾多？以過住神州嘅政策唔容許電訊商乿加價，但又要配合國策起基站，對電訊商嚟講負擔又幾大呢？長遠去睇，５Ｇ概念對電訊商係利定弊，缸友之後就要睇公司公布５Ｇ同４Ｇ客戶分布如何。以現時短線「炒概念」睇，中電信可能會比其他二隻更適合。
＊５Ｇ概念股選股，宜設備先行＊
保守一啲去睇，電訊商有佢嘅隱憂，所以炒５Ｇ概念可以以「設備先行」為選股原則，鐵塔固然係其中之一，不過弊病係估值偏貴，現時預測市盈率有近７１﹒３倍，而且下個星期五（２月８日）就係上市六個月禁售期結束嘅日子，相信嚟緊會先有一轉回調。不過，鐵塔始終係「強勢股」，另外加上有國策支持，缸友或者可以考慮喺下星期搵位買入。
另外，仲有兩隻設備先行嘅魚毛，仲有中通信（００５５２）同京信通信（０２３４２），其中後者月頭宣布獲得巴西主要大型多功能場館嘅覆蓋項目合約之後，股價又係一條完美上升軌。京信通信將要為為整個場館包括看台、球場、場館入口同停車場等，構建２Ｇ、３Ｇ及４Ｇ無線網絡，收入自然可觀。
另外，缸友都可以留意一隻股價相對落後嘅５Ｇ魚毛，好似神州光纖行業龍頭長飛光纖（０６８６９），其客戶主要係國內外嘅電訊網絡營運商，呢隻魚毛股價自上年開始疲弱，好大機會係因為光纖產品喺中美之間都被列入關稅清單所致，不過其實集團收入有八成七嚟自神州，加上中美貿易戰似乎有緩解跡象，現價唔算貴，如果以追落後嘅心態買入，缸友都可以考慮。
＊靜待新年過後，今周按兵不動＊
講返阿臣個倉。
魚缸連升四個星期後見回吐，不過都算正常啊，今日（３０日）同聽日（３１日）係神州國務院副總理劉鶴帶團去花旗國談判嘅日子，大家充都等緊有無好消息公布。魚缸近排轉勢，星期一（２８日）最高見過２７７９０點見近４個月高位，依家回落返去２７６００，現時距離二萬八關口仲有四百幾點距離，如果貿易會談有好消息傳出，咁新年後收復呢個關口指日可待矣！
新創建（００６５９）繼續再上，上星期四（２４日）見過股價新高１８﹒６銀，似乎可以企穩１８銀關口。另一隻魚毛潤電（００８３６）就喺１６銀見阻力，幾次都衝唔上，所以暫時都仍然觀望一下，阿臣個倉今周按兵不動。
農曆新年將至，古臣先喺到同大家拜個早年，祝大家豬年賺到盤滿砵滿，身體健康，萬事如意！新年後見。
表列截至１月３０日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
寶勝 １００００股 １﹒５６元 １﹒５３元 １５３００元
新創建 １０００股 １７﹒２４元 １７﹒９６元 １７９６０元
華潤電力 ２０００股 １５﹒９０元 １５﹒６６元 ３１３２０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ６４５８０元
剩餘現金 ： ８９３７０元
組合淨值 ：１５３９５０元
組合本月收益表現： ＋ ０﹒６％（截至上月底止組合淨值：１５３００１元）
組合累計收益表現： ＋４６﹒６％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
