魚缸上星期因為中美經濟數據疲弱而急瀉，最終連升七周夢碎，不過數據幾差都好，中美貿談仍然令缸友充滿憧憬，神州貿易代表會喺今個星期四（２１日）去花旗國繼續傾，最終有無實質成果，大家都要拭目以待。不過，古臣唔講咁遠，講返香江有份嘅粵港澳大灣區未來嘅發展。
＊規劃綱要有辣有唔辣，仍靜待具體措施出台＊
星期一（１８日）傍晚中央公布《粵港澳大灣區規劃綱要》，不如等阿臣講吓當中一啲嘅重點。其實，粵港澳大灣區規劃，就係一個廣州等九個內地城市，同香江及馬交兩個特區嘅分工，份《綱要》大約列出咗七個重點，當中明確將香江與馬交、廣州同深圳並列為「四大中心城巿」，其餘包括加大基建、物流同金融等嘅發展。當中有虛有實，比較實在嘅政策係講到會建設世界級機場群，同推動粵港澳遊艇自由行有效實施，探索喺合適區域，建設國際旅艇旅遊自由港，就咁聽似乎對旅遊同物流有比較好嘅發展，前者可以留意下中旅社（００３０８），呢隻魚毛２月開始就展開升勢，而且收復所有主要平均線，不過現時１４天ＲＳＩ去到７４﹒９１３嘅位置，缸友想入貨可能都要等等。
要炒大灣區概念嘅魚毛好多，但實際政策始終未出台。眼花撩亂下，古臣會揀比較防守性重嘅魚毛。
《綱要》入邊提到大灣區將打造成神州科技同金融中心，成為世界級城市群，交通運輸嘅網絡自然要配合，所以一啲建材佬、基建同物流佬都炒起，但要講率先受惠似乎就係一眾基建同物流佬，其中古臣睇好越秀交通（０１０５２）同深圳高速公路（００５４８），佢哋喺深圳擁有幾條高速，即是唔使等基建落成已經有錢收，前者之前仲派埋成績表，表現亮麗；而且呢類股份除咗業務具防守性，會有穩定嘅資金收入之外，息率亦同樣吸引，前者有逾６厘息，後者亦有４厘，重要係兩隻魚毛近排都創新高，表現十分強勢啊！
不過，今次大灣區發展都唔係個個板塊有利，好似《綱要》提到研究撤銷港澳手機漫遊費，相關措施可能對本地電訊商競爭增加，呢類板塊短期就有一輪沽壓，噚日（１９日）相關股份都有輕微下跌。另外，喺神州經濟有下行嘅壓力之下，缸友們嚟緊都要留意深圳經濟可唔可以維持到高增長，再講，現時《綱要》都只係勾劃出發展方向，暫時未有具體政策同措施，所以缸友都要仍然要留意政策風向。
大灣區嚟緊仲會有好多政策出台，到時阿臣再同大家ｕｐｄａｔｅ！
＊賣出寶勝，繼續持有新創建及潤電＊
魚缸走勢走勢，侵侵最新話中美貿談進展順利，但對於係唔係延長關稅期限嘅決定，仍然懸而未決，但有消息話花旗國要求神州承諾不要讓人仔進一步貶值，大市現時利用中美貿談嘅樂觀情緒，已經衝上二百五十天（約２８３０５點）有突，但經濟因素不容樂觀，避險情緒仍然高漲，金價已經見過十個月高，所以缸友們逢高減磅比較穩陣。
個股方面，今個星期我哋講起大灣區，阿臣持倉嘅新創建（００６５９）旗下都有唔少資產喺廣州，所以股價破咗１９銀之後一直企穩，睇個勢要再上２０銀似乎無難度。另一隻魚毛潤電（００８３６）就繼續喺１６銀關口上上落落。一直不動如山嘅寶勝（０３８１３）似乎亦啲動作，噚日開市彈過上１﹒６銀，但之後未見承托，而今日（２０日）亦上返買入價，所以阿臣就先行沽出。
表列截至２月１３日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
新創建 １０００股 １７﹒２４元 １９﹒８０元 １９８００元
華潤電力 ２０００股 １５﹒９０元 １６﹒２０元 ３２４００元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
賣出：
寶勝 １﹒５９元 １００００股 套現１５８８０元 ３００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５２２００元
剩餘現金 ： １０５２５０元
組合淨值 ： １５７４５０元
組合本月收益表現： ＋ ４﹒６％（截至上月底止組合淨值：１５０４９０元）
組合累計收益表現： ＋５０﹒０％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇
