最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

03/04/2019 11:35

《古臣周記-古臣》美債息倒掛,未必再係經濟哀退訊號?

  魚缸呢期走勢飄忽,上個星期先話憂慮經濟增長放緩而跌落二萬九關口,今個星期一(1日)神州官方公布嘅製造業PMI數據好過「孖屐」預期,魚缸重上二萬九千五;今日財新公布神州服務業PMI大幅反彈,魚缸更直逼三萬點大關。阿臣其實喺上星期都講到,50天線(28505點)已經升破250天線(28068點),形成「黃金交叉」,長期走勢唔差,之但係有一個指標大家都要留意,就係幾個月前阿臣喺呢到講到花旗國長短債息倒掛嘅現象。
 
*金融海嘯後債息倒掛出現更頻密?*
 
  雖然債息倒掛令人聞風喪膽,不過近排就有部分評論認為,今次倒掛可能未必需要憂慮,當中聯儲局前主席耶倫話,倒掛未必一定代表經濟衰退,可能只係一個訊號去促使聯儲局減息,而三藩市聯邦儲備銀行總裁戴利亦表示,今次倒掛並非經濟衰退的徵兆,因聯儲局喺預期利率走勢,同對經濟數據反應來睇,都減低經濟出現衰退的機會。
  影響債息走勢嘅因素,籠統去講包括經濟及通脹嘅預期、短期利率走勢及「期限溢價」(term premium),其中缸友可能對最後一點唔太了解,不如等阿臣解釋下咩係期限溢價」先。所謂「期限溢價」,係指長期國債相對於短期國債嘅超額回報率,反映因為債券期限較長而需要承擔更多風險嘅補償。「期限溢價」其實自上世紀八十年代就一直下跌,近年更加已經係跌至負數,有分析話正因為「期限溢價」一直處於低位嘅水平,咁先令到債息倒掛嘅現象變得更常見。
  另外,有評論都話自金融海嘯之後,各地央行開始出手介入買債,扭曲咗利率走勢,另外喺長期債嘅需求方面都有結構性嘅改變,好似以退休基金為首嘅長期基金,就睇中花旗國十年國債「無違約風險」嘅特性。另外自「雷曼爆煲」之後,監管機構對金融機構喺流動資金上都有更嚴格嘅要求,都令佢地對十年期長債呢類流動性較強嘅工具有更多嘅需求,夾埋上述退休基金嘅因素,令到「孖屐」對長期債嘅需求有改變。唔嫌阿臣長氣,都再喺到講多次,債價同債息嘅關係,債價升債息跌,反之亦然。
  不過,睇返過去數據嘅分析,喺最近三十年,花旗國出現過四次倒掛,而當中三次當地經濟會喺13至23個月之後就會陷入衰退,分別喺「第三次石油危機」、「科網泡沫爆破」同「金融海嘯」前夕,而無出現倒掛嗰次就正正係1997年亞洲金融風暴時期。
 
*中美製造業報喜,魚缸上望三萬點*
 
  神州同花旗國嘅製造業數據喺今個星期先後報喜,其中星期一晚花旗國供應管理學會(ISM)製造業指數由2月嘅54﹒2升到55﹒3,高過「孖屐」預期嘅54﹒5,新訂單和同工廠招聘情況都有改善,令到當晚花旗國十年債息大升,重上2﹒5厘嘅水平,而倒掛情況亦喺上星期五(3月29日)已經結束。
  兩派嘅論調各有己見,阿臣無水晶球唔知可見嘅將來邊一派嘅論調先正確,不過睇返過住經驗,由債息倒掛到經濟衰退最少仲有近一年時間,趁呢一年時間缸友們買貨配合靈活走位,應該都仲可以有斬獲。
  回顧魚缸今年首季嘅表現,累計漲幅逾一成二,係近十年來表現最好嘅季度,不過踏入第二季呢個勢頭,又可唔可以保持到呢?魚缸星期一已經上咗去二萬九千五呢個關口,其實睇埋公仔圖上方最重「蟹貨區」係接近三萬點嘅位置,只要今個月無風無浪要上三萬點應該唔難,但再上望嘅空間仲有幾多呢?阿臣諗缸友仍然要留意中美貿易戰去向,另外米字國「脫歐」愈投票愈唔明朗,缸友都要睇埋喺今個月最後限期前事態嘅去向,所以阿臣暫時仍然會空倉一排諗諗第二季嘅策略。
 
  表列截至4月3日(11:00am止)投資組合表現:
  ----------------------------------------
  股票市值      :     0元
  剩餘現金      : 95940元
  組合淨值      :145389元
  組合本月收益表現:   0﹒00%(截至上月底止組合淨值:145389元)
  組合累計收益表現: +38﹒47%(本金105000元計)(2016年8月開倉)
  ----------------------------------------
  *數據截至今日11:00am

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力