１０月係傳統嘅「股災月」，因為多次經典嘅大跌市都喺呢個月發生。就好似１９８７年嘅１０月，香江魚缸受外圍孖屐拖累，單月急瀉四成三，搞到聯交所都要宣布停市４日，係史上首次停市。睇返今年９月魚缸嘅表現，月頭時曾受惠本地政局短暫緩和，衝高見過２７３００點之後就拾級而下，似乎未受「金九銀十」神州消費旺季嘅憧憬帶動。
另一方面，目前影響香江魚缸走勢最深遠嘅就係神州同花旗國嘅貿易戰，最新一輪嘅貿易談判安排喺１０月嘅第二個星期，但花旗國侵侵（特朗普）最擅長喺談判期間突然施壓，令局勢急轉直下。唔知呢一輪談判會唔會令魚缸插水呢？如果１０月魚缸繼續下試，逆市下又好唔好部署下啲逆向ＥＴＦ呢？
＊逆向ＥＴＦ屬低風險槓桿對沖產品＊
首先，等阿臣同大家講解下逆向ＥＴＦ嘅概念。有別一般ＥＴＦ股份係追蹤相關指數或資產，例如之前同大家講黃金時提過嘅ＳＰＤＲ金ＥＴＦ（０２８４０）就係追蹤金價嘅走勢，逆向ＥＴＦ喺一種槓桿對沖產品，同對應嘅期貨沽空合約掛勾，例如比較多人買嘅ＦＩ二南方恒指（０７５００）就係同恒指沽空期貨掛勾。
喺香江，呢類反向槓桿產品嘅倍數最多為兩倍。意思即係當魚缸跌１巴仙，呢隻兩倍嘅逆向ＥＴＦ就會升２巴仙；相反，如果魚缸升１巴仙，佢就要跌２巴仙。呢類反向產品嘅優點係入場費低，最低幾百銀都有一手，而且無期貨同牛熊證咁對指數咁敏感，後者槓桿可以有幾十倍，如果買錯左方向，份份鐘蝕到入肉，同埋有補倉嘅需要。
通常買逆向ＥＴＦ嘅原因係因為手上有唔少正股，買番呢類同正股有同樣槓桿風險嘅反向產品做對沖會比較容易管理，而且風險同成本都較其他對沖工具為低，但回報自然亦都相對保守。
＊實際操作﹕只適宜對炒＊
除咗追蹤魚缸（恒指）之外，本地仲有追蹤國貨（國指）、花旗國納指１００指數同標普５００指數嘅逆向ＥＴＦ。所以如果真係睇淡後市，想買番啲反向產品做對沖，都可以選擇跟蹤唔同孖屐嘅指數。例如，近日有傳花旗國加強規管喺當地上市嘅中資概念股，甚至撤銷佢地嘅上市地位。若事件繼續發酵，可能較為拖累中資股嘅走勢，咁買入追蹤國指嘅反向產品回報率會高少少。
頭先同大家提過呢類反向產品主要用嚟做對沖，要達到呢個效果嘅話，最好都係即日賣買。因為如果持有多過一日，所累積嘅升跌幅度會因為槓桿同複合效應而變得唔同。譬如以一隻一倍看空恒指嘅產品來計，如果恒指第一日跌５巴仙，第二日升５巴仙，持有呢隻產品兩日仍然會蝕０﹒２５巴仙。因此，結合槓桿、孖屐波幅加大，以及日數再長啲，個回報就同當日恒指升幅愈嚟愈偏離，做唔到對沖嘅目的，所以都喺建議短線操作，第二日再根據市況作部署。
＊阿臣本周按兵不動＊
由於阿臣目前持倉數目唔多，暫時作中長線部署，加上預期１０月市況比較波動，逆向ＥＴＦ比較適宜短線部署，所以今個星期就唔考慮買入逆向ＥＴＦ，繼續按兵不動。
表列截至１０月２日（１１：１９ａｍ止）阿臣投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
３６１度 １００００股 １﹒７０元 １﹒７４元 １７４００元
金界 ２０００股 ９﹒６５元 １２﹒４８元 ２４９６０元
煤氣 １０００股 １６﹒００元 １５﹒２８元 １５２８０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５７６４０元
剩餘現金 ： １０３１０５元
組合淨值 ： １６０７４５元
組合本月收益表現： ＋０﹒４％（截至上月底止組合淨值：１６０１０５元）
組合累計收益表現： ＋５３﹒１％（本金１０５０００元計）（２０１６年８月開倉）
＊數據截至今日１１：１９ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
