最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

19/02/2020 11:45

《古臣周記-古臣》「小程序」營銷席捲神州,Saas股點揀?

  上兩期阿臣同大家講抗疫股嘅時候都有提過軟件股,憧憬遠程辦公軟件喺未來嘅需求會上升,今期阿臣想探討下另一啲科技相關股,就係呢排都算熱炒嘅Saas(軟件即服務)股,包括微盟(02013)。所謂Saas泛指唔使下載同安裝任何軟件就可以線上使用嘅應用程式同服務。
 
*社交平台流量巨大線上營銷應運而生*
     
  目前神州最火爆嘅社交App微信、QQ聊天程式同抖音等除左有社交互動嘅功能,近年仲加設左「小程序」嘅功能,專係比商家進行線上營銷。Saas供應商就係為商家提供線上同線下電子商務解決方案,幫佢地設計呢類「小程序」,等客戶利用多種營銷工具,例如發起團購、提供網上預約來擴大互聯網客戶基礎,仲可以用平台提供嘅數據來管理客戶。 
  依家神州最多人用嘅社交通訊平台微信(WeChat),入面有唔少小程序,就係由微盟呢間公司幫商家打造嘅線上銷售平台。用家唔使下載應用程式(APP),慳返手機啲RAM之餘,亦直接同自己嘅微信帳號同銀包連結,唔使每個App都申請一個帳號,方便交易。呢種方式配合各大平台嘅高流量人流,最啱就係用嚟做互聯網營銷。
  
*微信小程序日活躍用戶超過3億個*

  雖然依家微信小程序喺香江仍未普及,但大約喺2018年就已經開始搶佔神州孖屐。根據《2019年中國小程序行業市場分析》報告指出,截至2019年上半年,已經有8個平台推出左小程序,最先登陸嘅平台係QQ(00700)旗下嘅微信,亦係目前用戶規模最大嘅小程序平台,之後阿里巴巴(09988)嘅淘寶同支付寶程式,同埋神州科技巨頭之一嘅百度都相繼推出小程序。
  報告入面仲提及,微信平台發展比較成熟,用戶可以從會話窗口、公眾號或外面嘅App跳轉到小程序,呢類社交式平台嘅吸客能力比支付寶呢類工具性質較重嘅平台為高。
  根據微信團隊今年年初喺微信公開課上公布,小程序喺2019年日活躍用戶超過3億,累計八千幾億人仔交易額,按年增加1﹒6倍。而講到香江上市比較多人認識嘅Saas概念股就係微盟集團同中國有贊(08083),兩者都有係微信Saas方案嘅供應商,而且QQ同時都有入股。
 
*微盟前景穩定,中國有贊服務多元化*

  睇下微盟先,佢嘅增長前景比較強,因為2019年上半年扭虧為盈賺近3億人仔,但主要係由「可贖回及可換股優先股的公平值變動」嘅收入帶動,收入則增加九成七至近6﹒6億人仔,經營虧損收窄至250萬人仔。期內Saas付費商戶數目同每用戶平均收入(APRU)分別增長兩成四同一成三。大摩本月初(6日)曾唱好微盟,除咗估值吸引之外,仲預期微盟商業雲端可滿足零售商有意自設私人客戶平台嘅需求,帶動APRU持續擴張,料2018年至2021年年均複合增長達三成九。
  而中國有贊2019年上半年虧損擴大至近2億人仔,收入則增加近1﹒5倍至近6億人仔,經營虧損亦擴大至逾4億人仔,但連埋第三季,經營虧損已經輕微收窄至6﹒3億人仔。同微盟主打微信小程序有啲唔同,中國有贊目前微信商戶佔比約六至七成,另外佢亦支持快手、陌陌、小程序等多平台直播網絡,網紅效應更強。公司首席財務官俞韜話,借短視頻平台直播賣嘢成為新趨勢,舊年上半年錄得爆發性增長,未來可能成為新嘅電商模式! 

*本周持倉按兵不動*
 
  兩隻Saas股之中,阿臣認為中國有贊勝在業務憧憬有突破,又係Saas概念股嘅龍頭,但微盟增長前景穩定,而且業務復甦概念強啲,股份成交額仲遠超前者。不過,近排呢兩隻股嘅升勢有啲誇張,而且都接近嚴重超買嘅狀態,所以阿臣打算睇定啲再入貨。
  至於倉內其餘股票,阿臣都暫時唔郁住。 


 表列截至2月19日(上午11:30時止)阿臣投資組合表現:
 
 股份      股數     平均買入價(元)   現價(元)   總值(元)
 ----------------------------------------
 港股: 
 煤氣      1000股   16﹒00    15﹒14    15140
 SPDR金ETF  10股 1097﹒00  1171﹒00    11710
 平安好醫生    500股   52﹒90    80﹒60    40300
 阿里巴巴     100股  176﹒00   215﹒40    21540
 旺旺      1000股    7﹒09     6﹒31     6310
 深高速     2000股   11﹒15     9﹒82    19640
 ----------------------------------------
 股票市值    :  114640元
 剩餘現金    :   78650元
 組合淨值    :  193290元
 組合本月收益表現:  + 4﹒3%(截至上月底止組合淨值:185335元)
 組合累計收益表現:  +84﹒1%(本金105000元計)(2016年8月開倉)

 *數據截至今日上午11:30am

全新etnet健康網購,送你【健骨維他命D3(1000IU)】乙樽(價值$108)► 立即行動!

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力