上個星期五（６日）突然消息，俄羅斯同石油輸出國組織（ＯＰＥＣ）進一步減產嘅談判破裂，為了反擊，油組決定取消對其自身產量嘅所有限制，一場油價戰似蓄勢待發，孖屐彷彿再籠罩著２０１４年嗰場油價大跌嘅恐懼，布油一下子急插超兩成，跌至１１年以來最低。究竟２０１４年同今次有無咩關係？呢場石油戰爭背後嘅目的又係咩？對香江石油股又應該如何走？
＊各國爭市場份額＊
其實講到商品價格嘅升跌，最直接嘅因素點都離唔開供求關係，而２０１４年最主要就係呢個原因，就要先由頁岩油氣講起。自２００８年頁岩革命開始，頁岩油作為一種新資源，因技術嘅不斷突破，到２０１０至２０１４年喺花旗國石油產業中增長快速，並開始同傳統嘅石油輸出國爭奪市場份額，但當時因為全球剛經歷完２００８年金融海嘯，唔少國家經濟仲係恢復中，各國對於原油嘅需求不大，當時國際能源署（ＩＥＡ）、油組亦都相繼下調全球石油需求增長預期，而突然奮起嘅頁岩油氣，簡直就係從原本就唔太夠分嘅蛋糕再切走一塊。
因此，當時油組再三重申唔會減產，之後產油國為咗爭奪市場份額先後降價，嗰次嘅價格戰，令油價由６月最高詔過百美元樓上，一下子跌到１２月嘅５０美金附近。因此有分析認為油組嘅舉動係為咗令花旗國頁岩油氣開發知難而退，當時沙特阿拉伯嘅開採成本只需每桶１０美金，但頁岩氣成本要高達每桶５０至７０美金，所以就算價格跌到４５美金都仲有豐厚嘅利潤。而喺呢場爭奪戰中，的確係有做到打壓花旗國頁岩油氣開發嘅目的，令其２０１５年產量按年下跌超一半至每日９５萬桶。
＊歷史或會再重演＊
講返今年嘅情況，自新冠疫情爆發及迅速蔓延，全球石油需求面對到不可抗力因素，各國為防疫都採取出入境限制及停工。因此油組就開始討論通過減產嚟穩定油價，但係今次俄羅斯卻對減產特別反對，正當市場料佢會喺最後時刻點頭，萬萬估唔到佢今次咁堅持，不惜同沙特打起價格戰，仲話就算挨價挨十年都可以。究竟點解俄羅斯今次咁堅持，佢究竟喺到賭咩？
原來自頁岩油氣出現後，國際油價就無上過１４０美金，隨著技術嘅升級，只要油價升到７０美金，頁岩油氣嘅供應就會打壓油價，而且目前有九成嘅頁岩氣係來自花旗國。另外，根據花旗國能源部，上月花旗國原油日產量處於新高嘅１３００萬桶，其中頁岩油佔七成。加上喺上年為應對中美貿易戰，油組就已經減產一次，但花旗國方面仍然照常生產。因此市場就估今次俄羅斯係賭緊油價暴跌，係頁岩油氣生產商先頂唔住，定產油商先。但係同樣嘅套路，２０１４年成功左一次，今次同樣會ｗｏｒｋ？
據外媒報道，花旗國現時大部分頁岩油行業資金管道已接近枯竭，導致鑽探公司破產。但有分析師指，經歷過上次有許多頁岩油生產商都有避險，且該產業財務問題存在已久，較小企業間慢慢出現兼併潮，更有利行業發展。此外，頁岩生產成本近兩三年平均已下降三至五成，所以再用低價打壓成果成迷。
＊三桶油不宜沾手＊
先唔講今次油價戰成果如何，但油價大跌對於三桶油都唔係一件好事。其中對價格比較敏感嘅中海油（００８８３）就唔使講，佢差唔多所有收入都來自石油和天然氣銷售，油價大跌對佢傷得最深。而主要利潤來自煉油化工、勘探生產嘅中石油（００８５７），雖然直接影響無咁深，但因為佢好多合約都喺高價時期簽，所以對佢盈利有拖累。中石化（００３８６）做開煉油產品，油價跌對佢或係一件好事，但要留意，佢生產成本雖低咗，產品個價唔可能再按原價賣，所以都會對營收有影響。所以，阿臣覺得短期三桶股都不宜沾手。
另外，阿臣前幾期就同大家介紹咗ＳａａＳ股，當中比較睇好微盟集團（０２０１３）嘅前景，近排見到佢跟大市回落到４﹒５銀附近有支持，所以阿臣就喺４﹒５５銀買入兩手作中長線部署！
表列截至３月１１日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
煤氣 １０００股 １６﹒００ １５﹒３０ １５３００
ＳＰＤＲ金ＥＴＦ １０股 １０９７﹒００ １２１１﹒００ １２１１０
平安好醫生 ５００股 ５２﹒９０ ７２﹒３０ ３６１５０
阿里巴巴 １００股 １７６﹒００ １９９﹒７０ １９９７０
旺旺 １０００股 ７﹒０９ ６﹒１４ ６１４０
深高速 ２０００股 １１﹒１５ ９﹒３０ １８６００
微盟集團 ２０００股 ４﹒５５ ４﹒８８ ９７６０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： １１８０３０元
剩餘現金 ： ６９４３４元
組合淨值 ： １８７４６４元
組合本月收益表現： － ０﹒６％（截至上月底止組合淨值：１８８５６５元）
組合累計收益表現： ＋７８﹒５％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》如何搞好家庭關係？關係破裂幾時要放手？修補關係切忌讓XX充昏頭腦！► 即睇
