上個星期五魚缸都係升唔穿兩萬五,之後有啲回調,富仔個倉暫時都仲ok,未穿晒目標價,隻中海外(00688)就繼續等佢到價先入手!今次富仔加咗舜宇(02382)入倉!
舜宇前兩日(14日)公布1月份手機鏡頭出貨量1.31億件,按年跌11%,按月就轉升8.7%。手機攝像模組按年跌23.3%,按月同樣跌3.7%,係舊年11月以嚟最低。公司就話,依家整體智能手機市場需求疲軟。車載鏡頭叫好啲,按年同按月分別升2.5%同55.3%,去到752.7萬件。
*中金對舜宇前景樂觀*
雖然上個月手機鏡頭出貨量數據唔太理想,但係有大行唔太驚舜宇嘅前景。中金維持對舜宇「跑贏大市」評級,目標價271.7元。
中金解釋,舜宇手機鏡頭同手機攝像模組整體需求會較為平緩,行業格局逐步清晰,產品質素亦較好,對於呢方面嘅業務仍有信心,甚至話仍然係手機光學行業龍頭之一。該行都提到車載鏡頭嘅業務,按年依然有升幅,反映公司市場份額處於穩定水平。加上汽車芯片供應短缺問題逐步改善,公司作為龍頭車載鏡頭供應商之一,睇好佢會keep住受惠汽車智能化轉型。
*大戶近期積極買舜宇*
舜宇喺今個星期一(14日)早段低開近2%,一度低見近9個月新低嘅182.4銀,但好快回升3%,最多升超過4%,最後升2.55%,報192.8銀,成為當日表現第二好嘅藍籌股。留意當日恒指全日表現低迷,低開低收下跌350點,舜宇逆市倒升,明顯有投資者唔怕舜宇今次公布嘅出貨量數據。
資金流向或者有啲啟示,當日一度有超過6500萬資金淨主動買入,全日錄得2850萬資金淨主動流入。整體主動買沽比率51:49,大戶主動買沽比率就有62:38,反映大戶入市態度相當積極。去到今日,大戶主動買沽比率57:43,依然比整體主動買沽比率好,資金淨主動流入額亦都比上日多萬,連續四日錄得資金淨主動流入,情況比上星期理想。
*舜宇技術上有轉勢*
睇埋走勢圖,14號當日主要平均線仍然向下行,但最後以「曙光初現」嘅利好轉向形態收市。跟住一日因應大市回調少少,今日都升番上去,MACD熊差距收窄咗好多,相信股價會逐步向好。富仔留意到舜宇今個月多次嘗試突破10天線,最後都係唔成功,今次有轉勢訊號出現,有望可以突破。我已經喺192.3銀買500股,如果回調到185銀再買500股溝貨,跌穿埋2月14號低位182.4銀就平倉。
模擬投資組合
股份 | 股數 | 平均買入價(元) | 現價(元) | 總值(元) |
---|---|---|---|---|
美團 (03690) | 500股 | 228.00 | 219.40 | 109700 |
中海外 (00688) | 500股 | 設定買入價22.50(未到價) | 24.45 | - |
澳博 (00880) | 5000股 | 5.34 | 5.27 | 26350 |
舜宇 (02382) | 500股 | 192.30 | 192.60 | 96300 |
股票市值 : 232350元
剩餘現金 : 763000元
組合淨值 : 995350元
* 數據截至2月16日收市
全新etnet健康網購,送你【健骨維他命D3(1000IU)】乙樽(價值$108)► 立即行動!