呢兩個禮拜,魚缸都係窄幅上落,去到22400有幾大阻力,落番去20800點附近又有啲支持。始終呢排唔係著力炒俄烏問題,而係關注加息問題,事關美國通脤創40年高位,嚟緊可能因應持續升溫嘅通脹,喺5月份議息嗰陣,可能將加息幅度加大到半厘,魚缸嚟緊都可能受到影響,唔止富仔,大家都要有定心理準備啊!
*京東220銀再買過*
睇番個倉先,京東(09618)曾經失守當初定嘅止蝕位225銀,不過去到213銀有一定支持,近日股價都跟住20天線上,MACD牛差距都開始擴闊,張日線圖同魚缸一模一樣咁濟,走勢穩中向好。
不過,有樣嘢都要留意下,根據中央結算所(CCASS)資料顯示,由德意場志銀行託管嘅京東ADS股份數目,由截至上星期五(4月8日)嘅6.05億股增加到今個星期一(4月11日)嘅9.94億股,增幅超過64%,持股比例亦由22.6%升到37.11%。依家中美審計問題仍未完全搞掂,作為美股中概股之一嘅京東,有可能會被美國證交所除牌,未來或會有更多中概股由美股轉到香港,而經由託管行轉到其他券商嘅過程涉及搬倉活動,大有機會可以沽貨,所以部署上都唔會太進取。富仔噚日喺220銀買咗1000股,今次目標就set番低少少,睇番250銀水平,去到呢個位食胡先,跌穿213銀就止蝕。
*開拓藥業有力收復舊年底失地*
今次富仔加咗開拓藥業(09939)入倉。公司曾經公布,新冠藥物「普克魯胺」治療輕中症非住院新冠患者III期臨床試驗裏面,可以有效降低住院或死亡率,以及可顯著持續降低新冠病毒載量。呢次結果顯示,「普克魯胺」治療輕中症新冠受試者嘅整體耐受性良好,安全可控,而研究當中未發生任何嚴重不良事件。
事實上,公司舊年底曾公布,普克魯胺治療新冠非住院患者全球多中心嘅III臨床試驗進展報告,中期分析未達到統計學顯著性,消息傳出後股價即日由40銀水平急跌近八成。最新臨床試驗成效幾好,股價都即刻抽升,曾經反彈超過1.6倍,已經完全突破舊年底開展嘅橫行區,逐步向上收復之前嘅跌幅。
依家股價企穩喺10天同20天線之上,貼住保力加通道上緊,MACD牛差距都擴闊當中,走勢向好。當然,炒呢類B仔股都要有個風險:未有盈利!未賺到錢之下,都唔可以睇得太長線,依家買嘅都係買佢嘅前景,食住新冠疫情條水,短線有望繼續向上,富仔已經喺25銀買咗3000股,目標睇舊年底急跌嘅高位38銀,跌穿20銀就止蝕離場!
沽出之股份及收益(虧損)
股份 | 股數 | 平均買入價(元) | 平均賣價(元) | 收益(虧損)(元) |
---|---|---|---|---|
京東 (09618) | 1000股 | 236.00 | 225.00 | (11000) |
套現:225000元
模擬投資組合
股份 | 股數 | 平均買入價(元) | 現價(元) | 總值(元) |
---|---|---|---|---|
電盈 (00008) | 10000股 | 4.03 | 4.20 | 42000 |
領展 (00823) | 1000股 | 62.50 | 67.30 | 67300 |
京東 (09618) | 1000股 | 220.00 | 227.8 | 227800 |
吉利 (00175) | 5000股 | 12.00 | 11.22 | 56100 |
太平洋航運 (02343) | 10000股 | 3.60 | 3.63 | 36300 |
開招藥業 (09939) | 3000股 | 25.00 | 28.15 | 84450 |
股票市值 : 513950元
剩餘現金 : 430800元
組合淨值 : 944750元
* 數據截至4月13日收市
etnet榮獲HKEX Awards 2023 「最佳表現證券數據供應商」大獎► 了解詳情