《炒股戰記－施富》醫藥爆升揀康方，要埋泡泡唔使慌？

　　消化完加息，阿爺又不斷出招穩經濟，同大家大派定心丸，中概股、車股、內需股繼續上，魚缸呢兩個禮拜走勢好好，5月26號到今日為止嘅9個交易日，累計升咗超過1200點！當然喇，美國依家話就話加息半厘，但次數比以往頻密好多，油價係咁衝上去，今個星期五公布嘅通脹數據就顯得非常關鍵，下個星期三、四聯儲局議息，隨時左右嚟緊會唔會更agressive咁加息，大家要密切留意呀！
　　今日魚缸彈番上去100天線兩萬二附近，距離上一個頂位22523唔係差好遠，而由5月低位19178升到依家，呢浸反彈仲可以維持幾耐呢？除咗聯儲局加息之外，富仔覺得嚟緊「618購物節」嘅銷情都要留意，畢竟京東(09618)、巴巴(09988)呢啲電商股喺魚缸嘅份量都唔細。
　
*比亞迪有望挑戰歷史高位*
　
　　睇番個倉先，美團(03690)喺180銀水平整固一輪之後再爆上，前幾日已經去到200銀嘅另一個目標位，富仔已經沽埋剩低嘅300股，由151銀開始買，呢度夾埋都賺咗唔少！依家ATM嘅日線圖走勢都好似，趨勢都仲係向上，不過美團依家嘅9RSI差唔多到超買區，距離2月18號急跌嘅高位221銀唔係差好遠，富仔暫時唔會再追，確定佢破位而無乜潛在利淡風險下，先考慮再買過。
　　另外，比亞迪(01211)5月銷量keep住咁勁，依家仲成為Tesla嘅電池供應商，潛力好到不得了。股價持續上升，今日最高見305.8銀，強勢未止，加上只係剩低500股，就等埋佢上到歷史高位324銀附近先沽。
　　
*康方生物短線睇22銀*

　　今次富仔加咗兩隻股票入倉，第一隻係康方生物(09926)。公司主要從事生物製藥業務，並專注喺腫瘤學同免疫學治療領域。近日有就件好消息，就係自主研發嘅首創新型腫瘤免疫治療新藥卡度尼利(PD-1/CTLA-4雙特異性抗體)聯合一線治療復發/轉移性宮頸癌嘅II期臨床研究資料，已經喺2022年美國臨床腫瘤學會(ASCO)年會以口頭報告形式發布，結果顯示喺全人群中顯示出良好療效數據。另一隻自主研發嘅Ivonescimab(PD-1/VEGF雙特異性抗體)單藥治療晚期非小細胞肺癌(NSCLC)嘅Ib/II期研究結果，數據顯示出良好安全性同耐受性。
　　呢排「孖屐」興炒醫藥股，可能因為近排好多研究結果公布出嚟，都展示出唔錯治療效果，醫藥股嘭嘭聲咁上。當然，重磅醫藥藍籌藥明生物(02269)呢排畀北水掃貨，同系嘅藥明康德(02359)預計第二季收入增加最多65%，帶動埋其他醫藥股一齊升，相信呢浸反彈未咁快完。
　　睇番康方生物嘅日線圖，股價由舊年11月展開下跌浪，跌勢去到今年5月上旬緩和，低見11.5銀之後回穩。近期開始跟住藥股反彈，股價連續幾日企穩喺10天線之上，前日曾經升破條100天線，而今日更加企穩喺該線以上收市。雖然9日RSI已經升到79，但早排跌勢實在太急，而9周RSI只係上番去50幾啫。富仔覺得股價依家逐步收復失地，唔好錯過呢架反彈尾班車呀！我前日已經喺16.5銀買咗4000股，短線先留意上一個橫行區頂部、3月高位22銀水平，到價會先沽3000股，最後1000股就再上望30銀，跌穿14銀就止蝕。

*泡泡瑪特走勢轉強*

　　另一隻係泡泡瑪特(09992)，公司主要從事設計、開發同銷售潮流玩具產品。集團銷售同經銷網絡包括自有零售店、線上渠道（包括天貓旗艦店、泡泡抽盒機、葩趣及其他中國主流電台平台）、潮流玩具展同批發渠道（包括中國、韓國、日本、新加坡、美國等國家經銷商）。今年第一季，集團整體收益按年增長65%到70%，零售店更加按年增長75%到80%。
　　依家內地疫情逐步緩和，滬深兩地政府都推出支持經濟措施，上海就提出50條助企紓困新政策，包括緩繳「五險一金」同稅款、擴大房屋租金減免範圍、多渠道為企業減費讓利、加大退稅減稅力度、發放援企穩崗補貼等，呢啲措施對於有經營實體店嘅泡泡瑪特都有一定幫助。另外，「618購物節」就嚟到，有唔少電商股已經報定喜先，部分商品嘅預售反應都唔錯，泡泡瑪特有份同呢啲電商合作，估計可以從中受惠。
　　睇番股價走勢，泡泡瑪特由舊年11月開始跌，而且明顯受制於50天線，形成一底低過一底嘅格局。不過，股價喺今年3月15號跌到27.271銀之後反彈，5月下旬再次跌到27銀水平，但無穿前低，近幾日升破埋50天線，好大機會已經形成雙底，今日更加升破100天線，9日RSI同超買區仲有少少差距，9周RSI只係升番上50幾，相信嚟緊仲會繼續反彈。富仔前日喺34銀買咗4000股，第一個目標睇2月中同3月中嘅雙頂42銀水平，到價會沽3000股，再上望就睇50銀，跌穿27銀就止蝕。

　　
　　　　　　　　　　　　　　　　沽出之股份及收益(虧損)