《炒股戰記－施富》京東電商業務前景樂觀，有個板塊博追落後！

　　魚缸呢兩個星期喺20700至22140水平上落，畢竟環球通脹嚴重，各國央行又keep住加息，經濟前景充滿不確定性。既然個市咁悶，唯有炒板塊喇！呢排見到汽車、教育、內房股輪住炒，最hit嗰隻教育股新東方在綫(01797)更加由6月6日低位3.66銀係咁升，最高上到33.15銀先回落，累計升咗超過8倍。富仔相信魚缸維持上落市格局，板塊仲會輪住炒，今次都揀一個有力追落後嘅板塊。
　　睇番個倉，比亞迪(01211)股價早排曾經衝高到321.8銀，同前高位324.5銀接近，富仔喺321銀沽埋剩低嘅500股。比亞迪前景仍然樂觀，只係富仔想等佢回一回再買入。另外，康方生物(09926)噚日整咗支大陽燭，到咗第一個目標價22銀，所以亦已沽咗3000股，而呢幾日維持強勢，睇下升唔升到下一個目標30銀喇。
　
*京東初步目標260銀*
　
　　今次個倉加多兩隻股票，第一隻係京東(09618)．「618」購物節早前正式結束，京東累計落單金額超過3793億人仔，按年升10.3%，雖然按年增幅係有紀錄以來最小，但下落單金額就創新高，表現太差，其中超市全渠道、小時購同京東到家表現出色。
　　富仔認為，今次除咗留意京東「618」嘅落單金額之外，亦要留意營運方式有啲轉變。網絡平台「小紅書」喺購物節期間，同「618」有關嘅關鍵詞搜索量喺4至6月按年大增超過3倍，而今年購物節有唔少商家喺小紅書上架產品，用戶亦可以喺小紅書上直接買嘢，京東集團旗下「京東國際」已經進駐小紅書。
　　經過阿爺早前不斷嘅監管政策，京東、阿里巴巴(09988)等電商平台都轉下營運模式，會留意多咗消費者嘅體驗。由過去就咁買嘢，到依家會上網研究，甚至會喺小紅書呢類平台，睇下其他用家嘅評價同心得，先決定買唔買，推動到部分公司嘅銷量。外國藥妝品牌Dermasensa透過KOL喺小紅書直播帶貨，帶動今年購物節銷量按年大增6倍。富仔相信，京東經過今次購物節，未來可能會加強喺網上社區嘅宣傳，開拓更多客源，加埋疫後經濟復甦、消費券等疊加效應，京東喺電商嘅發展仍樂觀。
　　部署方面，京東6月7日裂口上升後，一直喺233.4到262銀上落，對上四個交易日喺260銀左右有啲阻力，今日跟住魚缸回調。富仔喺241銀買咗500股，初步目標留意260銀，到價會沽400股，最後100股會留意4月29號高位280銀水平，跌穿223銀就止蝕。
　
*潤電初步目標16.4銀*
　
　　另一隻係潤電(00836)，集團今年5月附屬電廠售電量約1229萬兆瓦時，按年少14.7%。不過，附屬風電場售電量約327萬兆瓦時，按年升0.3%；附屬光伏電站售電量約12.7萬兆瓦時，按年升39.7%，整體表現唔係衰到貼地嘅。
　　富仔特別留意近期阿爺就供電方面嘅言論，事關已經有重量級領導人先後發聲，話要保持供電穩定。國務院副總理韓正提到，要積極應對當前能源供應嘅突出矛盾，充分發揮煤炭嘅兜底保障作用，確保今年用電安全；國務院總理李克強考察涿州京源熱電公司嗰陣，話依家係迎峰度夏關鍵時期，要釋放煤炭先進產能、能開盡開，落實長協煤供應，進一步加強電力保供，堅決防止拉閘限電，保障經濟運行同基本民生。
　　煤炭供應曾經非常緊張，煤價keep住咁升，令到電廠發電成本增加，加上疫情令到多個城市停工停產，第一季業績唔靚仔都情有可原。富仔覺得隨住多個城市疫情逐步受控，生產有望恢復，阿爺除咗推出穩經濟政策外，亦希望供電可以正常番，達至今年5.5%嘅經濟增長目標，相信煤炭企業都要跟住國策走，而煤價走勢近排有回落跡象，對電力股有幫助。富仔相信喺保供電嘅大方向下，電力股可以追落後。
　　部署方面，喺日線圖上，潤電今個月喺13.44到約16.46銀上，上日一支大陽燭衝高，之後兩日受制於20天線，但仍然企穩喺10天線。喺周線圖上，潤電嘅保力加通道逐步收窄，股價跌勢亦放緩，近幾個月守得住100周線。富仔認為電力股早排畀高煤價困擾得太耐，阿爺亦唔希望各地有「拉閘限電」嘅情況再次發生，最壞嘅情況已經過咗，而潤電本身係國企，相對其他電力股穩陣。我已經喺14.48銀買咗6000股，初步目標睇16.4銀附近，到時會沽4000股，最後2000股會睇17銀，跌穿13銀就止蝕。
　
　　　　　　　　　　　　　　　　沽出之股份及收益(虧損)