即市新聞

29/08/2014 17:21

《小傳日記》A仔場回眸一笑,香江跟住跳一跳!

  《小傳日記》話咁快業績期終於到尾聲,各大企業都已經交出咗上半年成績表,成績係好定
壞,望一望股價就一清二楚。以成班大隻佬嚟講,祖國錢莊都算係最失色嘅一群,而石油石化股
都算威番次。
  雖然業績表都派得七七八八,缸友們都唔好掉以輕心,睇一睇公仔圖,香江魚缸唔單止穿咗
二萬五兼廿天線,就算A仔場踢番高近1巴仙收2217,香江跟勢收復逾百點失地,最尾倒升
1點收場,報24742,唔使連續四日向下碌。但都要小心淡友會隨時再發動猛烈襲擊,如果
連24200初步支持位都穿埋,下一站就要去番23500點。
  至於國貨佬指數,今日就食住A仔場強勢,袋番31點收10963,叨吓光過個
HAPPY周末。總結全日成交都唔錯,有逾813億銀。  

*4G試點增聯通最開心,尾市突倒升生發發好型*

  講到HAPPY,聯通(00762)今日一定係最開心藍戰士!話說,聯通收到阿媽通知
,話阿爺已經批准FDD 4G試驗城市,由16個大增至40個,多咗成倍有多,粉絲即掃貨
支持!再加埋,有消息傳出,聯通仲會同特斯拉(Tesla)簽合作協議,一齊喺祖國建立超
級充電站同埋充電樁,都令到聯通股價好似充咗電咁,衝高近4巴仙收13﹒82銀,仲最威水
藍戰士!
  生發發(00388)都一樣咁巴閉,明明呢幾日都「頭耷耷,眼濕濕」,今朝一開場就向
下碌,差DD就跌穿170銀,點知臨散場前,缸友突然湧入去掃貨,令到生發發倒升近2巴仙
收市,報178﹒1銀,衝番上去最威水大隻佬第五位,勁!

*大行齊唱好中海油高高,海油服仲叻由頭升到尾*

  除咗聯通同生發發表現咁勇猛之外,資源股大隻佬之一祖國海油(00883)都好威水,
公司中期袋336億人仔跌咗少少,但已經好過孖屐預期,加上有幾間大行出嚟美言幾句,摩通
仲升埋目標價去到16﹒5銀。今日個價有成3巴仙進帳,收報15﹒58銀,係第二靚仔大隻
佬。中海油服(02883)都由頭升到落尾,踢高5巴仙收22﹒95銀,做咗第二叻仔國貨
佬是也!
  街坊中石油(00857)中期盈利都有4個巴仙增長,不過績後表現癡癡呆呆,全日只係
踢高DD收報11銀。囝囝昆侖(00135)半年少賺咗14個巴仙,睇嚟孖屐就唔喺好
buy份成績表,朝頭早試過跌成4個巴仙有多,之後企番穩少少,收市都要跌1巴仙。 

*主席放風聲比亞迪勁升,協鑫業績好高盛看更高*

  國貨佬指數嘅靚仔代表,就由深受阿爺寵愛嘅比亞迪(01211)奪得,今朝走勢一路都
唔錯,逆市衝前,點知下半年馬力仲勁,突然爆升近6巴仙收55﹒05銀。原來有外地報道話
,主席王傳福放風,話阿爺其實考慮緊徵收新汽油稅,就咁可以提升電動車嘅吸引力,而新稅收
仲可能高達逾千億銀人仔,到時又可以資助推動新能源車啦!
  同樣係搞新能源嘅光伏股一哥保利協鑫(03800)半年業績都幾靚仔,虧轉盈賺9億銀
,仲畀高盛升目標至3﹒4銀,刺激股價全日升逾4巴仙收2﹒79銀。

*銀娛同金沙八連跌好誇,街坊也跟跌缸友心都怯*

  近日個勢好頹嘅濠賭股,今日似乎又無辜中箭,唔知同嚟緊禮拜日就喺新一屆馬交行政長官
選舉有無關係。兩隻藍籌大隻佬唔多爭氣,銀娛(00027)、金沙(01128)一度唔見
最多約4巴仙,雖然收市跌少好多,但兩個都已經連續跌咗八交易日,真係弱過弱煲。
  當中,新濠國際(00200)就派咗中期業績,期內賺咗成9億元,上升57巴仙,都算
有啲睇頭,不過完場都唔見近1巴仙。其他街坊表現都喺麻麻,永利澳門(01128)盤中就
試過跌成4個巴仙,好彩之後都係跌2巴仙。至於下周一(1日)除淨嘅澳博(00880)都
難逃跟跌,唔見近1巴。假期愉快,請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式之
       申述或訂立任何建議及推薦,讀者務請運用個人獨立思考能力自行作出投資決定
       ,如因相關建議招致損失,概與《經濟通》、編者及作者無涉。

全新節目《說說心理話》原生家庭對成長有咩影響?改善溝通有計可施?► 即睇

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力